নেশ্যনেল ডেক্স,7 জানুৱাৰীঃ ভাৰতীয় ৰে’লৱেই ইয়াৰ প্ৰাঙ্গণ আৰু ৰে’ল সমূহত একক ব্যৱহৃত প্লাষ্টিকৰ ব্যৱহাৰ বন্ধ কৰাৰ বাবে ইতিমধ্যে গ্ৰহণ কৰিছে বিভিন্ন ব্যৱস্থা ৷ ইয়াৰ পৰিণতি স্বৰূপেই উত্তৰ প্ৰদেশৰ বাৰাণসী ৰে’ল ষ্টেচনত ব্যৱসায়ীসকলক প্লাষ্টিকৰ পৰিৱৰ্তে পোৰামাটিৰে তৈয়াৰ কৰা ‘কুলহাদ্’,গিলাচ আৰু প্লেট ব্যৱহাৰত গুৰুত্ব আৰোপ কৰিছে ৷ এই ব্যৱস্থাই হেৰুৱাই যোৱা মৃৎ শিল্পীসকলৰ উপাৰ্জনৰো পথ প্ৰশস্ত কৰিব বুলি ব্যক্ত কৰে কৰ্মকৰ্তা সকলে ৷ আইআৰটিচি পৰিচালিত দোকানসমূহৰ লগতে বেচৰকাৰী দোকানসমূহতো ইতিমধ্যে মাটিৰ কাপত চাহ আৰু কফি পৰিৱেশন আৰম্ভ কৰা হৈছে ৷
উল্লেখ্য যে, প্ৰধানমন্ত্ৰী নৰেন্দ্ৰ মোডীৰ নেতৃত্বতে বাৰাণসী কেন্ট’নমেন্ট ৰে’লৱে ষ্টেচনে ইয়াক সম্পূৰ্ণৰূপে প্লাষ্টিক মুক্ত কৰাৰ দিশে ধাৱমান হৈছে ৷ কেৱল পানীৰ দৰে কিছুসখ্যক পদাৰ্থহে প্লাষ্টিকৰ উপকৰণত পৰিৱেশন কৰা হয় ষ্টেচন চৌহদত ৷ অন্যান্য দোকানসমূহত খাদ্য তথা অন্যান্য সামগ্ৰীসমূহ কাগজৰ মোনা অথবা জৈৱিক মোনাসমূহত পৰিৱেশন কৰা হয় ৷ উল্লেখ্য যে, ৰে’ল মন্ত্ৰণালয়ে বিগত বৰ্ষৰ 2 অক্টোবৰৰ পৰা আৰম্ভ হোৱা 50 মাইক্ৰ’নতকৈ কম ডাঠ একক ব্যৱহৃত প্লাষ্টিকৰ ব্যৱহাৰ নিষিদ্ধ কৰিছিল ৷
