নিউজ ডেস্ক, 11 নৱেম্বৰঃ ক্ৰমাৎ যেন অন্ত পৰিবলৈ ধৰিছে মহাৰাষ্ট্ৰত চৰকাৰৰ গঠনক লৈ বিভিন্ন দলৰ কুচকাৱাজ ৷ ৰাজ্যখনত শিৱসেনাৰ নেতৃত্বত চৰকাৰ গঠনৰ সম্ভাৱনা ৷ ইতিমধ্যে ৰাজভৱনত উপস্থিত হৈ ৰাজ্যপাল ভগত সিঙৰ পৰা 24 ঘন্টাৰ সময় সীমা বিচাৰিলে শিৱসেনাই ৷ দলটোৰ যুৱ নেতা তথা উদ্ধৱ ঠাকৰেৰ পুত্ৰ আদিত্য ঠাকৰেৰ লগত ৰাজভৱনলৈ গমন কৰে দলটোৰ আন কেইবাজনো শীৰ্ষ নেতাই ৷
ইপিনে, মহাৰাষ্ট্ৰত চৰকাৰ গঠনৰ ক্ষেত্ৰত সমৰ্থন প্ৰদানৰ আশ্বাস দিছে কংগ্ৰেছ দলে ৷ সোমবাৰে অনু্ষ্ঠিত হোৱা কংগ্ৰেছ দলৰ কাৰ্যবাহী কমিটিৰ বৈঠকত ইতিমধ্যে বিষয়টো সন্দৰ্ভত আলোচনা কৰাৰ লগতে শিৱসেনা প্ৰধান উদ্ভৱ ঠাকৰেৰ সৈতে এক টেলিফোনিক বাৰ্তালাপো হয় কংগ্ৰেছৰ অন্তৱৰ্তীকালীন সভানেত্ৰী ছোনিয়া গান্ধীৰ ৷ লগতে কংগ্ৰেছ সভানেত্ৰীগৰাকীয়ে এন চি পি প্ৰধান শাৰদ পাৱাৰৰ সৈতেও বাৰ্তালাপ কৰে ৷
লগতে পঢ়কঃ বায়ু প্ৰদূষণৰ পৰা বৰ্তমানেও মুক্ত নহয় দেশৰ ৰাজধানী
উল্লখ্য যে, সদ্যঘোষিত বিধানসভা নিৰ্বাচনৰ ৰাজ্যখনত বিজেপিয়ে সৰ্বমুঠ 105 আসন লাভ কৰাৰ বিপৰীতে শিৱসেনাই লাভ কৰিছিল 56 আসন ৷ আনহাতে, এন চি পিয়ে লাভ কৰিছিল 54 আসন আৰু কংগ্ৰেছে লাভ কৰিছিল 44 আসন ৷ প্ৰথমৱস্থাত বিজেপি আৰু শিৱসেনাই চৰকাৰ গঠন কৰাৰ কথা আছিল যদিও দুয়োটা দলৰ মাজতে মুখ্যমন্ত্ৰীৰ পদক লৈ সৃষ্টি হয় মতানৈক্যৰ ৷ ৰাজ্যখনৰ ৰাজনৈতিক মহলত চলা চৰ্চা অনুসৰি শিৱসেনা, এন চি পি আৰু কংগ্ৰেছে মহাৰাষ্ট্ৰত গঠন কৰাৰ সম্ভাৱনা আছে ৷
