নিউজ ডেস্ক, 20 জুনঃ ত্ৰিশ বছৰ পূৰ্বে গুজৰাটত সংঘটিত হোৱা এক মৃত্যুৰ গোচৰৰ ঐতিহাসিক ৰায়দান জামনগৰ আদালতৰ ৷ 1989 চনত জিলাখনত সংঘটিত হোৱা গোষ্ঠীগত সংঘৰ্ষৰ পিচতে আৰক্ষীয়ে আটক কৰিছিল এশৰো অধিক লোকক ৷ কিন্তু বৰ্বৰ অত্যাচাৰৰ ফলত আৰক্ষীৰ জিম্মাতে মৃত্যু ঘটিছিল প্ৰভুদাস মাধৱজী বৈষ্ণানী নামৰ লোকজনৰ ৷ সেই সময়ত জামনগৰ জিলাৰ আৰক্ষী অধীক্ষক আছিল গুজৰাট কেডাৰৰ আই পি এছ বিষয়া সঞ্জীৱ ভাট ৷ ঘটনাৰ সৈতে বিষয়াগৰাকীৰ নাম সাঙোৰ খাই পৰাৰ লগতে 2011 চনত চাকৰিৰ পৰা নিলম্বন হোৱাৰ লগতে 2015 চনত পদবীৰ পৰা বৰ্খাস্ত হৈছিল ভাট ৷
উল্লেখ্য যে, 1989 চনত জামনগৰ জিলাৰ জামযোধপুৰ তালুকাত সংঘটিত হোৱা গোষ্ঠী সংঘৰ্ষত সঞ্জীৱ ভাটৰ নিৰ্দেশত আৰক্ষীয়ে গ্ৰেপ্তাৰ কৰিছিল এশৰো অধিক লোকক ৷ আৰক্ষীয়ে গ্ৰেপ্তাৰ কৰা লোকৰ ভিতৰত বহুকেইগৰাকী লোক আৰক্ষীৰ অত্যাচাৰত গুৰুতৰভাৱে আঘাতপ্ৰাপ্ত হৈছিল ৷ আৰক্ষীৰ প্ৰহাৰত ৰমেশ মাধৱজী বৈষ্ণানী নামৰ লোকজন গুৰুতৰভাৱে আঘাতপ্ৰাপ্ত হোৱাৰ লগতে প্ৰভুদাস মাধৱজী বৈষ্ণানী নামৰ লোকজনৰ নবেম্বৰ মাহৰ 8 তাৰিখে গান্ধীদিয়া চিকিৎসালয়ত মৃত্যু ঘটিছিল ৷ ভাটৰ নিৰ্দেশত 1990 চনৰ 30 অক্টোৱৰত গুজৰাট আৰক্ষীয়ে টাডা আইনৰ অধীনত বৰ্বৰভাৱে হত্যা কৰিছিল 133গৰাকী লোকক ৷
অৱশেষত বৃহস্পতিবাৰে জামনগৰ সত্ৰ ন্যায়ালয়ে বিষয়াগৰাকীক উক্ত গোচৰত যাৱজ্জীৱন কাৰাদণ্ডৰ শাস্তি প্ৰদান কৰে ৷ ঘটনাৰ সৈতে ভাটৰ লগতে প্ৰবীন সিং জালা আন এগৰাকী আৰক্ষী বিষয়াকো যাৱজ্জীৱন কাৰাদণ্ড বিহে আদালতে ৷ আনহাতে পিএছআই শৈলেছ পাণ্ডেয়া, দীপক শ্বাহ, প্ৰবীন সিং জাডেজা, অনুপ সিং জেঠৱা আৰু কুসুম্বা জাডেজা নামৰ আৰক্ষীৰ লোককেইজনকো শাস্তি প্ৰদান কৰে আদালতে ৷
