নিউজ ডেস্ক, 24 মাৰ্চ : বিগ বছ জৰিয়তে জনপ্ৰিয় হৈ পৰা হাৰিয়ানাৰ নৃত্যশিল্পী স্বপ্না চৌধুৰীৰ কংগ্ৰেছ যোগদানৰ চৰ্চাক যতি পেলাই টুইটাৰযোগে কংগ্ৰেছত যোগদানৰ খবৰ খাৰিজ কৰিলে নৃত্যশিল্পীগৰাকীয়ে ৷
" মই কংগ্ৰেছত যোগদান কৰিম বুলি কোৱা নাই। বহু দিন আগতে প্ৰিয়ংকা গান্ধীৰ সৈতে উঠা এখন ফটোৰ বাবেই চলিছে এই চৰ্চা । এইবাৰ মই কোনো ৰাজনৈতিক দলৰ হৈও প্ৰচাৰ নচলাও"
উল্লেখ্য যে, শনিবাৰে স্বপ্না চৌধুৰীৰ এখন ফটো প্ৰকাশৰ পিচতেই কংগ্ৰেছত যোগদান সন্দৰ্ভত চৰ্চা চলিছিল। ছবিখনত উত্তৰ প্ৰদেশ কংগ্ৰেছৰ সদস্য নৰেন্দ্ৰ ৰাথীৰ ওচৰত স্বপ্নাই এখন কাগজত হস্তাক্ষৰ কৰি থকা দেখিবলৈ পোৱা গৈছিল আৰু প্ৰিয়ংকা গান্ধীয়ে তেওঁ সাক্ষাৎ কৰা বুলিও বাতৰি প্ৰকাশ পাইছিল ।
ইয়াৰ পূৰ্বে স্বপ্না চৌধুৰীয়ে মথুৰা লোকসভা সমষ্টিৰ পৰা হেমা মালিনীৰ বিৰুদ্ধে প্ৰাৰ্থিত্ব আগবঢ়াব বুলিও সংবাদ মাধ্যমযোগে প্ৰকাশ পাইছিল ৷
