নিউজ ডেস্ক,11 ডিচেম্বৰঃ সোমবাৰে মাজনিশা বহু বিতৰ্কিত নাগৰিকত্ব সংশোধনী বিধেয়ক গৃহীত হোৱাৰ পাচত এতিয়া শাসক বিৰোধীৰ দৃষ্টি নিবদ্ধ হৈছে ৰাজ্যসভাত ৷ বুধবাৰে ৰাজ্যসভাত এই বিধেয়কখন উত্থাপন হোৱাৰ সম্ভাৱনা আছে ৷ লোকসভাত দিনজোৰা বিতৰ্কৰ পাচত বিধেয়কখনৰ সপক্ষে 311 জন সাংসদে ভোটদান কৰাৰ বিপৰীতে বিধেয়কখনৰ বিৰুদ্ধে কেৱল 80 জন সাংসদেহে ভোটদান কৰিছিল ৷ ৰাজ্যসভাত এই বিধেয়কখন গৃহীত হ'বলৈ বিজেপি নেতৃত্বাধীন এন ডি এ 121 টা ভোটৰ প্ৰয়োজন হ'ব ৷ ৰাজনৈতিক বিশ্লেষকসকলৰ মতে, ৰাজ্যসভাতো বিধেয়কখন গৃহীত হোৱাৰ সম্ভাৱনা আছে ৷ কিয়নো জে ডি(ইউ,) শিৱসেনা, বিজেডি, আৰু পূৰ্বোত্তৰ ৰাজ্যৰ একাংশ দলে এন ডি এক সমৰ্থন দিয়াৰ পৰিপ্ৰেক্ষিতত ৰাজ্যসভাত এই বিধেয়কখন গৃহীত হোৱাৰ আশংকা কৰা হৈছে ৷ সম্প্ৰতি ৰাজ্যসভাত আছে 245 জন সদস্য ইয়াৰে 5 খন আসন এতিয়াও খালী হৈ আছে ৷ বিশ্লেষকসকলৰ মতে যদি সকলো সদস্যই ভোটদান কৰে তেতিয়াহ'লে শাসকীয় দলটোক কেৱল 121টা ভোটৰহে প্ৰয়োজন হ'ব ৷ সেই সূত্ৰে ৰাজ্যসভাত বিজেপি নেতৃত্বাধীন এন ডি এৰ শক্তি হৈছে এনেধৰণৰ-
- বিজেপি-83
- বিজেডি-7
- এ আই এ ডি এম কে-11
- আকালী দল-3
- শিৱসেনা-3
- জে ডি ইউ -6
- ৱাই এছ আৰ (কংগ্ৰেছ)-2
- এল জে পি-1
- আৰ পি আই-1
- আৰু মনোনীত সদস্য-4 ৷
বিলৰ সপক্ষে এই সংখ্যা হয়গৈ 121 ৷
কিমান আছে বিৰোধীৰ-
পৰিসংখ্যাৰ হিচাপত ৰাজ্যসভাত কেব প্ৰতিৰোধ কৰাৰ বাবে বিৰোধীৰ সংখ্যা সন্তোষজনক নহয়৷
বিৰোধীৰ শক্তি এনেধৰণৰ-
- কংগ্ৰেছ-46
- তৃণমূল কংগ্ৰেছ-13
- সমাজবাদী পাৰ্টি-9
- বাওপন্থী দল-5
- ডি এম কে-5
- আৰ জে ডি-4
- এন চি পি-4
- বি এছ পি-4
- টিডিপি-2
- মুছলিম লীগ-1
- পিডিপি-2
- জে ডি এছ-1
- কেৰালা কংগ্ৰেছ-1
- টি আৰ এছ-6
- মনোনীত-1
- আম আদমি পাৰ্টি-3
কেবৰ সপক্ষে বা বিপক্ষে অৱস্থান ল'ব পৰা স্থিতিত আছে আন কেবাটাও দলৰ সদস্য ৷ আন্দোলনমুখী পূৰ্বোত্তৰৰ ৰাইজৰ আশা আকাংক্ষা নিৰ্ভৰ কৰিব উল্লেখিত সাংসদসকলৰ ভূমিকাৰ ওপৰত৷ তেওঁলোক হৈছে-
- অগপ-1
- বিপি এফ-1
- এম ডি এম কে-1
- এন পি এফ-1
- এছ ডি এফ-1
- পি এম কে-1
বহু বিতৰ্কিত নাগৰিক সংশোধনী বিধেয়কৰ বিৰুদ্ধে অসম তথা উত্তৰ পূৰ্বাঞ্চল অগ্নিশিখাত দগ্ধ হৈ থকাৰ সময়তে দেশৰ ভিন্ন প্ৰান্ততো বিভিন্ন দল সংগঠনে এই বিধেয়কৰ বিৰোধিতাৰে আন্দোলন তীব্ৰতৰ কৰি তুলিছে ৷ বৃহত্তৰ অসমীয়া জাতি জনগোষ্ঠীৰ ভাষা সংস্কৃতি আৰু অস্তিত্বৰ সংকট সৃষ্টি কৰাৰ পূৰ্ণ সম্ভাৱনা থকা বিধেয়কখনৰ বিৰুদ্ধে অসম তথা পূৰ্বোত্তৰৰ সাংসদসকলে কি স্থিতি গ্ৰহণ কৰে সেয়া এই সময়ৰ আটাইতকৈ গুৰুত্বপূৰ্ণ প্ৰশ্ন ৷
লগতে চাওকঃ কেব ভাৰতৰ আভ্যন্তৰীণ বিষয়; ইয়াকে লৈ বাহিৰৰ দেশৰ মন্তব্য নিষ্প্ৰয়োজনঃ পি.এল.পুনিয়া
