নিউজ ডেস্ক, 29 জুলাইঃ দীৰ্ঘদিনীয়া অপেক্ষাৰ অন্তত সোমবাৰে বহু প্ৰত্যাশিত খবৰটো লাভ কৰে ওড়িশাবাসীয়ে ৷ ৰাজ্যখনৰ প্ৰখ্যাত ৰসগোল্লালৈ চেন্নাইস্থিত ভৌগোলিক সংকেত পঞ্জীয়কৰ কাৰ্যালয়ে প্ৰদান কৰে ভৌগোলিক সংকেত ৷ জিঅ'গ্ৰাফিকেল ইণ্ডিকেশ্বন অৱ গুডছ( ৰেজিষ্ট্ৰেশ্বন এণ্ড প্ৰটেকশ্বন) এক্ট,1999ৰ অধীনত ৰাজ্যখনৰ ৰসগোল্লাক প্ৰদান কৰা হয় এই বিশেষ সাংকেতিক মানক ৷ ভৌগোলিক সংকেত পঞ্জীয়কৰ কাৰ্যালয়ে প্ৰদান কৰা প্ৰমাণ-পত্ৰ অনুসৰি 2028 চনৰ ফেব্ৰুৱাৰী মাহৰ 22 তাৰিখলৈ এই সাংকেতিক মানক বৈধ থাকিব ৷ পশ্চিমবংগৰ সৈতে দীৰ্ঘদিনীয়া এক সংঘৰ্ষৰ অন্তত ৰাজ্যখনে লাভ কৰিছে এই সাংকেতিক মানক ৷ উল্লেখ্য যে, 2017 চনতে বাংলাৰ ৰসগোল্লা নামে পশ্চিমবংগয়ো লাভ কৰিছিল ৰসগোল্লাৰ ভৌগোলিক সংকেত ৷
