নিউজ ডেস্ক,26 জানুৱাৰী: 72 সংখ্যক গণৰাজ্য দিৱস উপলক্ষে দেশবাসীলৈ শুভেচ্ছা বাৰ্তা প্ৰেৰণ কৰিলে মিজোৰামৰ ৰাজ্যপাল পি.এছ শ্ৰীধৰণ পিল্লায়ে ৷ ৰাজ্যপাল গৰাকীয়ে কয়, স্বাধীনতা সংগ্ৰামী সকলৰ অসংখ্য ত্যাগৰ বিনিময়ত আজি ভাৰতবৰ্ষ সাৰ্বভৌম,গণতান্ত্ৰিক,গণৰাজ্য হিচাপে প্ৰতিষ্ঠা লাভ কৰিবলৈ সক্ষম হৈছে ৷ ভাৰতৰ সংবিধানৰ প্ৰস্তাৱনাটো ‘We the people’ শব্দকেইটাৰে আৰম্ভ হৈছে যাৰ অৰ্থ এইটো যে ভাৰতত আমি নাগৰিকসকল সকলোতকৈ ওপৰত ৷ আমাৰ সংবিধানে জাতি,ধৰ্ম, লিংগ নিৰ্বিশেষে সকলো লোককে সম অধিকাৰ প্ৰদান কৰিছে ৷ সাম্প্ৰতিক সময়তো সময়ে সময়ে দেশৰ ভিতৰৰ আৰু বাহিৰৰ বহু শক্তিয়ে আমাৰ সাৰ্বভৌমত্বক আক্ৰমণ কৰিব বিচাৰে ৷ কিন্তু আমি মনত ৰখা উচিত যে, অনৈক্যৰ মাজত ঐক্যই আমাৰ দেশৰ মূলমন্ত্ৰ ৷
ৰাজ্যপাল গৰাকীয়ে আৰু কয়, বিগত 2020 বৰ্ষত ক’ভিড 19 মহামাৰীয়ে সমগ্ৰ বিশ্বৰ লগতে ভাৰতকো যথেষ্ট পৰিমাণে ধ্বংস কৰিছে ৷ এই মহামাৰীৰ সৈতে যুঁজ দি থকা সময়ৰ অসংখ্য সমস্যা থকা সত্বেও কেন্দ্ৰীয় আৰু মিজোৰাম চৰকাৰে এই সমস্যাসমূহৰ সৈতে মোকাবিলা কৰাৰ ক্ষেত্ৰত লক্ষণীয় স্থিতিস্থাপকতা আৰু দূৰদৰ্সীতা প্ৰদৰ্শন কৰিছে ৷ এই বিপদৰ সময়তো ভৰতে সমস্যাটোৰে সাহসিকতাৰে যুঁজ দিছে ৷ আমাৰ বিজ্ঞানীসকলে ক’ভিড 19ৰ প্ৰতিষেধক প্ৰস্তুত কৰি উলিয়াইছে যি বৃহৎ হাৰত সমগ্ৰ দেশতে বিতৰণ কৰা হৈছে ৷ বৈশ্বিক নেতা হিচাপে আমি এই প্ৰতিষেধক আমাৰ চুবুৰীয়া দেশসমূহৰ লগতে বিভিন্ন দেসলৈ ৰপ্তানি কৰিছো ৷ এই পদক্ষেপে প্ৰধানমন্ত্ৰী নৰেন্দ্ৰ মোদীৰ আত্মনিৰ্ভৰ ভাৰতৰ সূত্ৰত সম্পূৰ্ণৰূপে থিয় দিবলৈ সক্ষম হৈছে ৷ ইয়াৰ উপৰিও গণৰাজ্য দিৱসৰ এই ক্ষণত ভাৰতৰ বীৰ জোৱানসকললৈ শ্ৰদ্ধা জ্ঞাপন কৰে মিজোৰামৰ ৰাজ্যপাল পি.এছ শ্ৰীধৰণ পিল্লায়ে ৷
লগতে পঢ়ক-শীৰ্ষ স্থলসেনা বিষয়া লেফটেনেন্ট জেনেৰেল ৰানা প্ৰতাপ কলিতালৈ ইউৱাইএছএম সন্মান
