নেশ্যনেল ডেস্ক, 7 ফেব্ৰুৱাৰী : খাদ্য সুৰক্ষা আৰু প্ৰামাণিক (আমদানী) অধিনিময়, 2017 (FSSAI Regulations) ৰ ভিতৰত অন্তৰ্ভূক্ত নোহোৱা আৰু পূৰ্বে প্ৰস্তুত কৰা খাদ্য সামগ্ৰীসমূহৰ ক্ষেত্ৰত প্ৰতিবন্ধকতা আৰোপ কৰিছে মনিপুৰে ৷ প্ৰাণনাশক কৰ'ণাভাইৰাছৰ আতংকৰ বাবে চীন, ম্যানমাৰ আৰু দক্ষিণ-পূৱ এছিয়াৰ দেশসমূহৰ পৰা অহা এনে খাদ্যসমূহত প্ৰতিবন্ধকতাৰ কথা শুকুৰবাৰে মনিপুৰ চৰকাৰৰ বিষয়ববীয়াই জানিবলৈ দিয়ে ৷
স্বাস্থ্য সেৱা নিৰ্দেশালয়ৰ অতিৰিক্ত খাদ্য সুৰক্ষা কমিছনাৰ কে. ৰাজু সিঙে জানিবলৈ দিয়ে যে, "চীন, ম্যানমাৰ আৰু অন্য দক্ষিণ-পূৱ এছিয়াৰ দেশসমূহৰ পৰা FSSAI Regulations ৰ ভিতৰত অন্তৰ্ভূক্ত নোহোৱা খাদ্য আমদানী কৰিব নোৱাৰিব ৷ কোনো লোকে এনে সামগ্ৰীৰ উৎপাদন, বিতৰণ, বিক্ৰী অথবা বিক্ৰীৰ বাবে সাজু কৰি ৰাখিব নোৱাৰিব ৷"
সতৰ্কতামূলক উপায় হিচাপে স্বাস্থ্য সেৱা নিৰ্দেশালয়ে চীন, ম্যানমাৰ আৰু দক্ষিণ-পূৱ এছিয়াৰ দেশসমূহৰ পৰা অহা খাদ্য সামগ্ৰী ভক্ষণ নকৰিবলৈ সকলোকে অনুৰোধ জনাইছে ৷
লগতে স্বাস্থ্য বিভাগৰ সৈতে জড়িত সকলো চৰকাৰী বিষয়াকে ৰাজ্যখনত নিৰীক্ষণ কৰাৰ লগতে জনস্বাস্থ্যৰ প্ৰতি লক্ষ্য ৰাখি এনে সামগ্ৰী লাভ কৰিলে জব্দ কৰিবলৈ নিৰ্দেশ প্ৰদান কৰিছে ৷
উল্লেখ্য যে, মনিপুৰৰ সৈতে ম্যানমাৰৰ 398 কি.মি. দৈঘ্যৰ আন্তৰাষ্ট্ৰীয় সীমা সংলগ্ন হৈ আছে ৷
আনহাতে, চীন, থাইলেণ্ড আৰু ছিংগাপুৰৰ পৰা 11 জানুৱাৰীৰ পৰা 5 ফেব্ৰুৱাৰীৰ ভিতৰত মনিপুৰত প্ৰৱেশ কৰা সকলো লোককে নিজ নিজ বাসগৃহত স্বাস্থ্যৰ নিৰীক্ষণ কৰি থকা হৈছে ৷ কে. ৰাজুয়ে জানিবলৈ দিয়া অনুসৰি, 172 জন লোকৰ নমুনা লোৱা হৈছে আৰু ৰাষ্ট্ৰীয় ক'লেৰা সংস্থালৈ পৰীক্ষাৰ বাবে প্ৰেৰণ কৰা হ'ব ৷
মনিপুৰত দুজন লোকৰ ছোৱাইন ফ্লু' হোৱাৰ তথ্য লাভ কৰাৰ পাচতে এই জাননী জাৰি কৰা হয় ৷
আৰু পঢ়ক : বিমানবন্দৰত প্ৰধানমন্ত্ৰীক সাক্ষাৎ সাংসদ নৱ শৰণীয়াৰ
