নিউজ ডেস্ক, ২৯ জুনঃ মহাৰাষ্ট্ৰ চৰকাৰে ৰাজ্যখনত পুনৰ বৃদ্ধি কৰিলে লকডাউনৰ সময়সীমা । কোভিড-১৯ৰ সংক্ৰমন ৰোধৰ বাবে ৩১ জুলাইলৈকে উদ্ধৱ থাকৰে নেতৃত্ত্বাধীন চৰকাৰে বৃদ্ধি কৰিলে লকডাউন । ইয়াৰ পূৰ্বে ৩০ জুনলৈকে লকডাউন ঘোষণা কৰিছিল চৰকাৰে ।
ৰাজ্যখনৰ মুখ্য সচিব অজয় মেহতাই এই সন্দৰ্ভত এক নিৰ্দেশ জাৰি কৰিছে । নিৰ্দেশনা অনুসৰি, যি কেইখন জিলাত অধিক সংখ্যক লোকৰ কোভিড-১৯ পজিটিভ পোৱা গৈছে সেই জিলাসমূহৰ কালেক্টৰ, পৌৰ নিগমৰ কমিশনাৰে উক্ত অঞ্চলত কঠোৰ লকডাউন ঘোষণা কৰিব পাৰে ।
এই ভাইৰাছৰ সংক্ৰমন ৰোধৰ বাবে জনসাধাৰণ চলা-ফুৰাত বাধা, অপ্ৰয়োজনীয় সামগ্ৰী ক্ৰয় কৰিবলৈ যোৱাত বাধা, ঘৰত বাহিৰত ব্যায়াম কৰা আদিত বাধা প্ৰদান কৰিব পাৰে । তদুপৰি সকলো লোকে কোভিড-১৯ ৰ বাবে গ্ৰহণ কৰিবলগীয়া সাৱধানতা বিশেষকৈ মাস্ক পৰিধান কৰা, সামাজিক দূৰত্ব মানি চলা আদি সকলো নিয়মাৱলী মানি চলিব লাগিব ।
উল্লেখ্য যে, দেশৰ ভিতৰত মহাৰাষ্ট্ৰত সৰ্বাধিক লোক আক্ৰান্ত হৈছে মহামাৰী কোভিড-১৯ত । এইপৰ্যন্ত ৰাজ্যখনত ১,৬৪,৬২৬ গৰাকী লোক কোভিড-১৯ আক্ৰান্ত হৈছে । ইয়াৰ ভিতৰত ৭০,৬২২ গৰাকী ৰোগী চিকিৎসাধীন অৱস্থাত থকাৰ বিপৰীতে মৃত্যুমুখত পৰিছে ৭,৪২৯ গৰাকী লোক।
