নিউজ ডেস্ক, 24 এপ্ৰিলঃ নৰ্ডান কামাণ্ডৰ জেনেৰেল অফিচাৰ ইন কামাণ্ডিং ইন চীফ চমুকৈ জি অ চি ইন চি লেফ. জেন. ৰনবীৰ সিং উপস্থিত হয় লাডাখৰ শীৰ্ষ সেনা চাউনীত ৷ চীন সীমান্ত লাডাখ অঞ্চলত কৰ্তব্যৰত সেনাৰ লাডাখ স্কাউটৰ বিষয়া জোৱানসকলৰ সৈতে সামৰিক আলোচনাত মিলিত হয় সেনাৰ শীৰ্ষ বিষয়াগৰাকী ৷
সেনাৰ সামৰিক দায়িত্বৰ ক্ষীপ্ৰতা আৰু অন্যান্য সামৰিক তথা অভিযানমূলক দিশসমূহৰ বুজ লোৱাৰ উদ্দেশ্যেই এইদৰে লাডাখ সীমান্ত ভ্ৰমণ কৰে সেনাৰ শীৰ্ষ বিষয়াগৰাকীয়ে ৷ লেফ. জেন. সিঙৰ এই ভ্ৰমণকালত তেওঁক সংগ দিয়ে 14 কৰ্পছৰ কামাণ্ডাৰ লেফ. জেন য়োগেশ কুমাৰ যোশীয়ে ৷ আনহাতে দুয়োগৰাকী বিষয়াক সামগ্ৰিক সামৰিক দিশৰ লগতে সুৰক্ষাজনিত দিশৰ ওপৰত বিতং তথ্য প্ৰদান কৰে তৃতীয় ইনফেন্ট্ৰী ডিভিজন ওৰফে ত্ৰিশূল ডিভিজনৰ কামাণ্ডাৰে ৷ নিজৰ ভ্ৰমণকালত লাডাখত দায়িত্বৰত সেনা বিষয়া-জোৱানসকলৰ কষ্ট আৰু ত্যাগৰ প্ৰশংসা কৰাৰ লগতে ভৱিষ্যতে যিকোনো পৰিস্থিতিৰ সৈতে মুখামুখি হ'ব পৰাকৈ নিৰ্দেশ প্ৰদান কৰে ৷
