পশ্চিমবংগ আৰক্ষীৰ জালত আন এটা জেএমবি সন্ত্ৰাসবাদী

পশ্চিমবংগ আৰক্ষীৰ এছ টিএফে বিশেষ তথ্যৰ ভিত্তিত বিগত শনিবাৰে ইষ্ট কেনেল ৰোডৰ গজনাভি ব্ৰীজৰ পৰাই গ্ৰেপ্তাৰ কৰিছিল মহম্মদ আবুল কাচেম,আব্দুল বাৰি,নিজামুদ্দিন খান নামৰ জামাতুল মুজাহিদীন বাংলাদেশৰ সন্ত্ৰাসবাদীকেইটা ৷ সন্ত্ৰাসবাদীকেইটাৰ ভাষ্যৰ ভিত্তিতে চেন্নাইৰ আন এজন সন্ত্ৰাসবাদীক গ্ৰেপ্তাৰ কৰে এছটিএফে ৷

নিউজ ডেস্ক, 10 ছেপ্তেম্বৰঃ পশ্চিমবংগ আৰক্ষীৰ জালত পৰিছে জামাতুল মুজাহিদীনৰ আন এক সন্ত্ৰাসবাদী ৷ বিগত শনিবাৰে তিনিগৰাকীকৈ জামাতুল মুজাহিদীন বাংলাদেশৰ সন্ত্ৰাসবাদীক গ্ৰেপ্তাৰ কৰিছিল পশ্চিমবংগ আৰক্ষীৰ এছটিএফে ৷

ধৃত সন্ত্ৰাসবাদীটো আছাদুল্লা শ্বেইখ ওৰফে ৰাজা

আৰক্ষীৰ প্ৰাৰম্ভিক অনুসন্ধানত,সন্ত্ৰাসবাদীকেইটাৰ পৰা জব্দ কৰা লেপটপৰ পৰা উদ্ধাৰ হৈছিল দেশৰ আভ্যন্তৰীণ সুৰক্ষাৰ কেতবোৰ গোপনীয় তথ্য ৷ বিশেষকৈ সেনাবাহিনী আৰু চি আৰ পি এফৰ বহুটো গোপন তথ্য সংৰক্ষণ কৰি ৰাখিছিল সন্ত্ৰাসবাদীকেইটাই ৷ দেশৰ সুৰক্ষাৰ প্ৰতি ভাবুকি সৃষ্টি কৰা এইসমূহ তথ্য প্ৰকাশৰ পৰা বিৰত থাকে যদিও সেনা আৰু চি আৰ পিএফৰ দলে সন্ত্ৰাসবাদীকেইটাক চলোৱা মাৰাথন জেৰাৰ অন্তত আনটো সন্ত্ৰাসবাদীক চেন্নাইৰ পৰা আটক কৰিবলৈ সক্ষম হয় বিশেষ অভিযানকাৰী দলটোৱে ৷

আৰু পঢ়কঃ সন্ত্ৰাসবাদীৰ হাতত সেনা আৰু চি আৰ পিএফৰ গোপন তথ্য

পশ্চিমবংগ আৰক্ষীৰ এছ টিএফৰ জালত পৰা জেএমবি সন্ত্ৰাসবাদীটোক আছাদুল্লা শ্বেইখ ওৰফে ৰাজা বুলি চিনাক্ত কৰিছে আৰক্ষীয়ে ৷ শ্বেইখ পশ্চিমবংগৰ পূৰ্ব বৰ্ধমান জিলাৰ বাসিন্দা আৰু আৰক্ষীৰ পৰা বাচিবলৈ চেন্নাইৰ নিলানগাৰাই অঞ্চলত লুকাই আছিল ৷ শ্বেইখৰ পৰা আৰক্ষীয়ে কেতবোৰ গুৰুত্বপূৰ্ণ নথি জব্দ কৰাৰ লগতে ট্ৰানজিট ৰিমাণ্ডৰ বাবে চেন্নাইৰ আলান্দুৰ আদালতত হাজিৰ কৰায় ৷ উল্লেখ্য যে, আগষ্ট মাহৰ শেষৰ পৰা এতিয়ালৈকে পশ্চিমবংগ আৰক্ষীয়ে পাঁচগৰাকী জেএমবি সন্ত্ৰাসবাদীক গ্ৰেপ্তাৰ কৰিবলৈ সক্ষম হৈছে ৷ 2018 চনৰ বোধ গয়া বিস্ফোৰণৰ মূল অভিযুক্ত জেএমবি সন্ত্ৰাসবাদীটোক বিহাৰৰ পৰা বিগত সপ্তাহত গ্ৰেপ্তাৰ কৰিছিল ৷