নিউজ ডেস্ক, ২৯ জুনঃ কেৰালা টেকনিকেল বিশ্ববিদ্যালয়ৰ সকলো পৰীক্ষা স্থগিত ঘোষণা কৰিলে বিশ্ববিদ্যালয় কৰ্তৃপক্ষই। ৰাজ্যখনৰ কোভিড-১৯ৰ শেহতীয়া পৰিস্থিতিৰ প্ৰতি লক্ষ্য ৰাখি এই সিদ্ধান্ত গ্ৰহণ কৰে ৰাজ্য চৰকাৰৰ শিক্ষা বিভাগ তথা বিশ্ববিদ্যালয় কৰ্তৃপক্ষই ।
১ জুলাইৰ পৰা অনুষ্ঠিত হ'বলগীয়া আছিল কেৰালা টেকনিকেল বিশ্ববিদ্যালয়ৰ পৰীক্ষা। কিন্তু ৰাজ্যখনত প্ৰতিদিনে বৃদ্ধি পোৱা কোভিড-১৯ আক্ৰান্ত ৰোগীৰ সংখ্যাৰ প্ৰতি লক্ষ্য ৰাখি বিশ্ববিদ্যালয় কৰ্তৃপক্ষই এই সিদ্ধান্ত গ্ৰহণ কৰিবলৈ বাধ্য হয়। সম্প্ৰতি একাডেমিক কমিতিয়ে এই বিষয় সন্দৰ্ভত আলোছনা অব্যাহত ৰাখিছে। কোভিড-১৯ৰ এই সংকটৰ সময়ত পৰীক্ষাৰ দিন ঘোষণা কৰাক লৈ পূৰ্বে বিশ্ববিদ্যালয়খনৰ ছাত্ৰ-ছাত্ৰীৰ লগতে অভিভাৱকসকলে প্ৰশ্ন উত্থাপন কৰিছিল।
উল্লেখ্য যে, বৰ্তমানলৈকে কেৰালাত ৪,১৯০ গৰাকী লোকৰ দেহত কোভিড-১৯ৰ উপস্থিতি লাভ কৰা গৈছে। ইয়াৰে ২,০১৫ গৰাকী লোক চিকিত্সাধীন অৱস্থাত থকাৰ বিপৰীতে আৰোগ্য লাভ কৰিছে ২,১৫০ গৰাকী। আনহাতে, এই মহামাৰীৰ ফলত ৰাজ্যখনত মৃত্যু হৈছে ২৩ গৰাকী লোকৰ।
