নেশ্বনেল ডেস্ক, 12 অক্টোবৰ : কেৰালা ধাৰাবাহিক হত্যাকাণ্ডৰ মূল অভিযুক্ত জলী ছাজুৰ লগতে ঘটনাৰ সৈতে জড়িত আন দুজন লোকক পোন্নামাত্তম বাসগৃহলৈ লৈ যায় আৰক্ষীয়ে ৷ কেৰালাৰ কজিকডে জিলাৰ কোডাথায়ি গাঁৱত 14 বছৰৰ ভিতৰত এটা পৰিয়ালৰ 6 জনকৈ লোকক হত্যা কৰাৰ সন্দেহত এই তিনিজনক আটক কৰে আৰক্ষীয়ে ৷ জলীৰ সৈতে এই ঘটনাৰ সৈতে জড়িত থকাৰ সন্দেহ কৰা হৈছে এম. এছ. মেথিউ আৰু পি. প্ৰাজিকুমাৰ নামৰ দুজন লোকক ৷ 14 বছৰৰ ভিতৰত ছাইনাইড ব্যৱহাৰ কৰি এটা পৰিয়ালৰে 6 জনকৈ লোকৰ প্ৰাণ লয় তিনিওজন লোকে ৷
ইয়াৰ পাছতে অভিযুক্ত তিনিওজনকে জলীৰ প্ৰাক্তন স্বামী ৰয় মেথিউৰ খুৰাকৰ ঘৰলৈ লৈ যোৱা হয় ৷ এই সময়ছোৱাত স্থানীয় লোকসকলে হুলস্থলীয়া পৰিৱেশৰ সৃষ্টি কৰাৰ লগতে অভিযুক্ত কেইজনৰ বিৰুদ্ধে শ্ল'গান দিয়া আৰম্ভ কৰে ৷
উল্লেখ্য যে, মৃত লোককেইজনৰ সমাধি খান্দি মৃতদেহৰ অৱশিষ্ট সংগ্ৰহ কৰি পোষ্টমৰ্টেম কৰাৰ পাছতে তিনিজন লোকক আটক কৰা হৈছিল ৷ অক্টোবৰৰ 16 তাৰিখে স্থানীয় এখন আদালতত তিনিওজন অভিযুক্তকে হাজিৰ কৰোৱা হ'ব ৷
কোডাথায়ি গাঁৱত 2002 চনৰ পৰা 2016 চনৰ ভিতৰত এটা পৰিয়ালৰ 6 জনকৈ লোকৰ মৃত্যু হৈছিল ৷ প্ৰথমেই মৃত্যু হৈছিল জলীৰ শাহুৱেক আৰু শেহতীয়াকৈ মৃত্যুক সাৱটি লয় পৰিয়ালৰ আত্মীয় তথা দুবছৰীয়া এটি সন্তানৰ মাতৃ ছিলী ৷ এসপ্তাহৰ পূৰ্বে জলীয়ে স্বীকাৰ কৰিছিল যে পৰিয়ালৰ আটাইকেইজন লোকৰে হত্যাকাণ্ডত তেওঁ জড়িত আছে ৷ অনুসন্ধানকাৰী বিষয়াই জানিবলৈ দিয়া অনুসৰি, সমগ্ৰ সম্পত্তি নিজৰ হাতলৈ অনা আৰু ছিলীৰ স্বামী ছাজু জাছাৰিয়াক বিয়া কৰোৱাৰ উদ্দেশ্য এই হত্যাকাণ্ডৰ পৰিকল্পনা কৰিছিল জলীয়ে ছাজুয়ে ৷
