নিউজ ডেস্ক, 20 আগষ্টঃ জম্মু-কাশ্মীৰৰ পৰিস্থিতিলৈ লক্ষ্য কৰি সমগ্ৰ অঞ্চলটোতে শিথিল কৰি দিয়া হৈছে ধাৰা 144 ৷ অনুচ্ছেদ 35(A) আৰু 370 প্ৰত্যাহাৰ তথা জম্মু-কাশ্মীৰক কেন্দ্ৰীয় শাসিত অঞ্চল ঘোষণা কৰাৰ পিচৰে পৰাই ৰাজ্যখনত জাৰী কৰা অনিৰ্দিষ্টকালীন 144 ধাৰা ৷ শেহতীয়াকৈ চৰকাৰী কাৰ্যালয়কে ধৰি,বিদ্যালয় তথা অন্যান্য অনুষ্ঠান প্ৰতিষ্ঠানকে ধৰি জনসাধাৰণৰ জীৱনধাৰা সাধাৰণ অৱস্থালৈ অহালৈ লক্ষ্য কৰি কিছু শিথিল কৰি দিয়া হয় 144 ধাৰা ৷
জম্মু-কাশ্মীৰ প্ৰশাসনৰ পৰিকল্পনা আয়োগৰ মুখ্য সচিব ৰোহিত কাঞ্চালে বুধবাৰে প্ৰকাশ কৰিছে এই তথ্য ৷ বিষয়াগৰাকীয়ে প্ৰকাশ কৰা তথ্য অনুসৰি বিভিন্ন স্থানৰ পৰা সৰু-সুৰা বিক্ষিপ্ত তথা অপ্ৰীতিকৰ ঘটনাৰ তথ্য নিৰাপত্তা বাহিনীয়ে লাভ কৰিছে ৷ স্থানীয় আৰক্ষী প্ৰশাসন তথা অসামৰিক প্ৰশাসনৰ যুটীয়া সহযোগত তেনেকুৱা পৰিস্থিতি নিয়ন্ত্ৰণত ৰখা হৈছে ৷ সমগ্ৰ জম্মু-কাশ্মীৰতে জনসাধাৰণৰ মাজত জীৱনধাৰণৰ অৱস্থা কিছু উন্নত হৈছে ৷ যাৰ বাবে ইতিমধ্যে জাৰী কৰা 144 ধাৰা কিছু শিথিল কৰি দিয়ে প্ৰশাসনে ৷ বুধবাৰে ম'বাইল আৰু ইন্টাৰনেট সেৱাৰ ওপৰত থকা নিষেধাজ্ঞা উঠাই দিয়ে স্থানীয় প্ৰশাসনে ৷ অৱশ্যে শ্ৰীনগৰৰ বিভিন্ন স্থানত বাট-পথত জনসাধাৰণৰ সেৰেঙা উপস্থিতি পৰিলক্ষিত হোৱাৰ লগতে বন্ধ থাকে দোকান-পোহাৰকে ধৰি অন্যান্য প্ৰতিষ্ঠান ৷
লগতে পঢ়কঃ বিদ্যালয়কে ধৰি চৰকাৰী কাৰ্যালয়ত উপস্থিতি বৃদ্ধি জম্মু-কাশ্মীৰত
উল্লেখ্য যে, বিগত 5 আগষ্টৰ পৰাই জম্মু-কাশ্মীৰত আৰোপ কৰা হৈছিল অনিৰ্দিষ্টকালীন 144 ধাৰা ৷ কেন্দ্ৰীয় চৰকাৰে গ্ৰহণ কৰা সিদ্ধান্তৰ পিচতেই নিৰাপত্তাজনিত কাৰণত এইদৰে 144 ধাৰা জাৰী কৰি হৈছিল সমগ্ৰ জম্মু-কাশ্মীৰত ৷
