ফৰ্ৰুখাবাদ কাণ্ডৰ অভিযুক্তৰ কন্যাক নিজৰ কৰি লোৱা আৰক্ষী বিষয়াগৰাকী

উত্তৰ প্ৰদেশৰ ফৰ্ৰুখাবাদত 23 গৰাকী শিশুক আৱদ্ধ কৰি লোৱা কাণ্ডৰ মুল নায়ক সুভাষ আৰু তেওঁৰ পত্নী ৰুবীৰ মৃত্যুৰ পিচতে তেওঁলোকৰ একমাত্ৰ কন্যা সন্তান গৌৰীৰ দায়িত্ব কান্ধপাতি লৈ উত্তৰ প্ৰদেশ আৰক্ষী বিভাগৰ মহাপৰিদৰ্শক মোহিত আগৰৱালে ৷

নিউজ ডেস্ক, 3 ফেব্ৰুৱাৰীঃ 23গৰাকীকৈ শিশুক প্ৰথমে আৱদ্ধ কৰি লোৱা আৰু ইয়াৰ পিচতে আৰক্ষীৰে সৈতে হোৱা সংঘৰ্ষত মৃত্যুবৰণ কৰা অভিযুক্ত সুভাষৰ একমাত্ৰ কন্যাক নিজৰ কৰি লৈ মহানুভৱতাৰ পৰিচয় দাঙি ধৰিলে এগৰাকী আৰক্ষী বিষয়াই ৷ আৰক্ষীৰে সৈতে হোৱা সংঘৰ্ষত সুভাষ নিহত হোৱাৰ লগতে উন্মত্ত জনতাই তেওঁৰ পত্নী ৰুবীকো বৰ্বৰতাৰে হত্যা কৰিছিল ৷ ইয়াৰ পিচতে অকলশৰীয়া হৈ পৰিছিল তেওঁলোকৰ এবছৰীয়া একমাত্ৰ কন্যা সন্তান গৌৰী ৷ কিন্তু ঘটনাৰ পিচতে সুভাষৰ আত্মীয় স্বজন আৰু অন্য়ান্যই তেওঁলোকৰ একমাত্ৰ সন্তানৰ দায়িত্ব ল'বলৈ অস্বীকাৰ কৰে ৷

এই ঘটনাৰ পিচতেই উত্তৰ প্ৰদেশ আৰক্ষী বিভাগৰ মহাপৰিদৰ্শত মোহিত আগৰৱালে গৌৰীৰ দায়িত্ব ল'বলৈ আগবাঢ়ি আহে ৷ এগৰাকী সৎ আৰক্ষী বিষয়া হিচাপে সুনাম থকা মোহিত আগৰৱালে মহানুভৱতাৰ পৰিচয় দাঙি ধৰি, সন্তোষ আৰু ৰুবীৰ একমাত্ৰ কন্যা গৌৰীৰ দায়িত্বভাৰ নিজে গ্ৰহণ কৰে ৷ ইয়াৰ উপৰিও আৰক্ষী বিষয়াগৰাকীয়ে প্ৰকাশ কৰা অনুসৰি, গৌৰীক ভাল শিক্ষানুষ্ঠানত পঢ়াই শুনাই এগৰাকী দক্ষ আৰক্ষী বিষয়া হিচাপে গঢ় দিবলৈ চেষ্টা কৰিব ৷ বৰ্তমানে আৰক্ষী কনিষ্টবল ৰঞ্জনীয়ে গৌৰীৰ চোৱাচিতা কৰি আছে ৷