পশ্চিম বংগৰ নাম সলনিৰ প্ৰস্তাৱ নাকচ কেন্দ্ৰীয় গৃহমন্ত্ৰালয়ৰ

বৃহস্পতিবাৰে লোকসভাত এই প্ৰসংগ উত্থাপন হোৱাৰ সময়ত গৃহমন্ত্ৰালয়ে প্ৰত্যাখান কৰিলে বংগৰ মুখ্যমন্ত্ৰীৰ এই প্ৰস্তাৱ ৷ 2018 চনৰ 26 জুলাইত পশ্চিমবংগ বিধানসভাই পশ্চিমবংগ নাম সলনি কৰি নতুনকৈ "বাংলা" কৰাৰ এক প্ৰস্তাৱ গ্ৰহণ কৰিছিল ৷

নিউজ ডেস্ক, 21 নৱেম্বৰ: বৃহস্পতিবাৰে লোকসভাত প্ৰত্যাখান হ'ল পশ্চিম বংগৰ নাম সলনি কৰাৰ প্ৰস্তাৱ ৷ লোকসভাত ৰাজ্যিক গৃহমন্ত্ৰী নিত্যনন্দ ৰায়ে এই প্ৰস্তাৱ প্ৰত্যাখান কৰি কয় যে ৰাজ্য এখনৰ নাম এনেদৰে সলনি কৰিব পৰা নাযায় ইয়াৰ বাবে সংবিধান সংশোধনৰ প্ৰয়োজন তেনেস্থলত এই প্ৰস্তাৱ গ্ৰহণ কৰিব পৰা নাযায় ৷

উল্লেখযোগ্য যে, 2018 চনৰ 26 জুলাইত পশ্চিমবংগ বিধানসভাই পশ্চিমবংগ নাম সলনি কৰি নতুনকৈ "বাংলা" কৰাৰ এক প্ৰস্তাৱ গ্ৰহণ কৰিছিল ৷ বিধানসভাত গৃহীত হোৱাৰ পাছতে এই প্ৰস্তাৱ কেন্দ্ৰীয় গৃহমন্ত্ৰালয়ৰ পৰ্যবেক্ষণৰ বাবে প্ৰেৰণ কৰা হৈছিল ৷ ইয়াৰ পূৰ্বেও ৰাজ্যখনৰ তৃণমূল কংগ্ৰেছৰ ৰাজ্যসভাৰ সাংসদ সুখেন্দু দে'য়ে উচ্চ সদনত ইংৰাজী,বাংলা আৰু হিন্দী ভাষাত পশ্চিমবংগৰ নাম সলনি কৰি বাংলা কৰিবৰ বাবে দাবী জনাইছিল ৷

মন কৰিবলগীয়া যে,যোৱা বছৰ কেন্দ্ৰীয় গৃহ মন্ত্ৰালয়ে সমগ্ৰ ভাৰতবৰ্ষৰ প্ৰায় 25 খন চহৰ আৰু গাঁৱৰ নাম সলনি কৰা প্ৰস্তাৱত সন্মতি প্ৰদান কৰিছিল কিন্তু পশ্চিমবংগৰ ক্ষেত্ৰত এই নাম সলনিৰ প্ৰস্তাৱত গৃহ মন্ত্ৰালয়ক সন্মতি প্ৰদান কৰা দেখা নগ'ল ৷ যিকি নহওক কেন্দ্ৰীয় গৃহ মন্ত্ৰালয়ৰ এই প্ৰস্তাৱৰ পাচতে এলাহবাদৰ নাম সলনি কৰি প্ৰয়াগৰাজ আৰু ফেইযাবাদৰ নাম সলনি কৰি অযোধ্যা ৰখা হৈছিল ৷

আৰু পঢ়ক: ৰাষ্ট্ৰীয় নাগৰিকপঞ্জীঃ বাহিৰৰ নেতাক বিশ্বাস নকৰিবলৈ আহ্বান মমতাৰ