নেশ্যনেল ডেস্ক, ২৫ আগষ্ট : অৱশেষত স্বদেশলৈ উভতি যোৱাৰ অনুমতি লাভ কৰিলে পাকিস্তানৰ ছাজ্জাদ বুঢ়াউদ্দিন ৱ'ৰাই । নকল মুদ্ৰাৰ গোচৰত নিৰ্দোষী প্ৰমাণিত হোৱাৰ পিছতে সোমবাৰে পাকিস্তানী নাগৰিকজনক স্ব-গৃহলৈ যোৱাৰ অনুমতি দিছে গুজৰাট উচ্চ ন্যায়ালয়ে । ২০১৬ চনত নকল মুদ্ৰাৰ গোচৰত পাকিস্তানী নাগৰিকগৰাকীক আটক কৰিছিল চুৰট ৰে'ল আৰক্ষীয়ে । সম্পৰ্কীয় লোকৰ সৈতে ধৰ্মীয় সভাত অংশ ল'বলৈ মুম্বাইলৈ গৈ আছিল ছাজ্জাদ বুঢ়াউদ্দিন ৱ'ৰা । পিছত আদালতত নিৰ্দোষী প্ৰমাণিত হয় যদিও তেওঁক পাকিস্তানলৈ উভতি যোৱাৰ অনুমতি দিয়া নাছিল ।
২০১৯ চনৰ ১৭ আগষ্টত উচ্চতম ন্যায়ালয়েও তেওঁৰ আবেদন খাৰিজ কৰিছিল । ছাজ্জাদ বুঢ়াউদ্দিনৰ অধিবক্তা ঔম কটৱালে পাকিস্তানলৈ উভতি যোৱাত অনুমতি দিবলৈ যোৱা জুলাইত উচ্চ ন্যায়ালয়ত আবেদন জনাইছিল । অৱশেষত ছাজ্জাদ বুঢ়াউদ্দিনক আপত্তিবিহীন নথি প্ৰদানৰ বাবে গুজৰাট উচ্চ নায়্যালয়ে আৰক্ষীক নিৰ্দেশ দিয়ে । ন্যায়াধীশ ছোনিয়া গ'কানি আৰু এন ভি অঞ্জাৰাৰ বিচাৰপীঠে অহা ২৯ আগষ্টৰ ভিতৰত নাগৰিকজনক পাকিস্তানলৈ পঠিয়াবলৈ যাৱতীয় ব্যৱস্থা গ্ৰহণৰ বাবে আৰক্ষীক নিৰ্দেশ দিয়ে । উল্লেখ্য যে, ছাজ্জাদক ইচ্ছাৰ বিৰুদ্ধে ভাৰতত ৰখা হৈছে বুলি অভিযোগ উত্থাপন কৰিছিল পাকিস্তানৰ উচ্চায়ুক্তই।
লগতে পঢ়ক : চিকিৎসাধীন ৰাম বিলাস পাছৱান, স্বাস্থ্য সুস্থিৰ
