নিউজ ডেস্ক,1 নৱেম্বৰ : পশ্চিমবংগৰ দুই প্ৰান্তত অভিযান চলাই শনিবাৰে প্ৰায় 6.22 কোটি টকাৰ 12 কিলোগ্ৰাম অবৈধ সোণ জব্দ কৰাৰ লগতে ঘটনা সন্দৰ্ভত 5 জনক আটক কৰে ৰাজহ চোৰাং নিৰ্দেশালয়ে ৷
নিৰ্দেশালয়ে সদৰি কৰা মতে, ৰাজহ চোৰাং নিৰ্দেশালয়ে বৃহস্পতিবাৰে কলকাতা আৰু শুকুৰবাৰে চিলিগুড়িত অভিযান চলাইছিল ৷ অভিযানৰ অন্তত নিৰ্দেশালয়ে কলকাতা আৰু চিলিগুড়িৰ পৰা 6.882 কিলোগ্ৰাম আৰু 4.980 কিলোগ্ৰাম চোৰাংভাৱে সৰবৰাহ কৰা সোণ জব্দ কৰিবলৈ সক্ষম হয় ৷
নিৰ্দেশালয় কৰ্তৃপক্ষই প্ৰথমটো অভিযান হিচাপে বাংগুৰ এভেন্যুত এখন বাহনত তালাচী চলাই 6.882 কিলোগ্ৰাম ওজনৰ 42 খন সোণৰ বিস্কুট জব্দ কৰে ৷ এই সোণৰ বিস্কুটখিনিৰ মূল্য় 3.62 কোটি টকা বুলি নিৰ্দেশালয়ে জানিবলৈ দিয়ে ৷ বাহনখনৰ গৰাকীৰ স্বীকাৰোক্তি অনুসৰি,সোণখিনি বাংলাদেশৰ পৰা সৰবৰাহ কৰা হৈছিল ৷
পৰৱৰ্তী সময়ত নিৰ্দেশালয় কৰ্তৃপক্ষই লোকজনৰ বাসগৃহ আৰু অন্য দুই স্থানত তালাচী চলাই মুঠ 88.17 লাখ টকা নগদ ধন জব্দ কৰিবলৈ সক্ষম হয় ৷ এই ধনখিনি চোৰাং সোণ বিক্ৰী কৰি পোৱা টকা বুলি লোকজনে স্বীকাৰ কৰে ৷ ইয়াৰ পাচতে লোকজনৰ সৈতে তেওঁৰ পিতৃ আৰু কৰ্মচাৰীকো আটক কৰে নিৰ্দেশালয়ে ৷
আনহাতে, দ্বিতীয়টো অভিযান হিচাপে নিৰ্দেশালয় কৰ্তৃপক্ষই চিলিগুড়ি-দাৰ্জিলিঙ এলেকাত এখন বাহনত তালাচী চলাই 4.980 কিলোগ্ৰাম ওজনৰ 30 খন সোণৰ বিস্কুট জব্দ কৰে, যাৰ মূল্য় 2.60 কোটি টকা ৷ এই সেণৰ বিস্কুটখিনি মণিপুৰৰ পৰা সৰবৰাহ কৰা বুলি বাহনৰ গৰাকী দুজনে স্বীকাৰ কৰে ৷
চোৰাং নিৰ্দেশালয়ে জনায় যে,2019-20 বৰ্ষত তেওঁলোকে পশ্চিমবংগ আৰু ছিক্কিমত প্ৰায় 300 কিলোগ্ৰাম সোণ আৰু 5 কোটিতকৈও অধিক টকা জব্দ কৰিবলৈ সক্ষম হৈছে ৷
লগতে পঢ়ক : নৈশ বাছৰ পৰা কাৰ্টুনে কাৰ্টুনে জব্দ নিচাযুক্ত সামগ্ৰী
