নেশ্যনেল ডেস্ক, 21 জানুৱাৰীঃ সংশোধিত নাগৰিকত্ব আইনক লৈ বিৰোধীয়ে জনসাধাৰণক বিপথে পৰিচালিত কৰি থকা বুলি উল্লেখ কৰে দেশৰ গৃহমন্ত্ৰী অমিত শ্বাহে ৷ মঙলবাৰে উত্তৰ প্ৰদেশৰ লক্ষ্মৌত এক জনসভা সম্বোধন কৰি গৃহমন্ত্ৰীগৰাকীয়ে যিমানে প্ৰতিবাদ নকৰক কিয় এই আইন বাতিল কৰা নহয় বুলি উল্লেখ কৰে ৷
আনহাতে এই সভাত অমিত শ্বাহে নাগৰিকত্ব সংশোধনী আইনৰ সমৰ্থন কৰি উল্লেখ কৰে যে অযোধ্যাত গগণচুম্বী ৰাম মন্দিৰ নিৰ্মাণ হ’ব আৰু আগন্তুক তিনি মাহৰ ভিতৰত এই ৰাম মন্দিৰৰ কাম আৰম্ভ হ’ব ৷
ইয়াৰোপৰি কংগ্ৰেছ, সমাজবাদী দল, বহুজন সমাজবাদী দল আৰু তৃণমুল কংগ্ৰেছে নাগৰিকত্ব সংশোধনী আইনক লৈ সৰ্বসাধাৰণক ভুল পথে পৰিচালিত কৰা বুলি কটাক্ষ কৰে ৷ লগতে তেওঁ কয় নাগৰিকক নাগৰিকত্ব প্ৰদানৰ অৰ্থে নাগৰিকত্ব আইনক সংশোধন কৰা হৈছে ৷ এই নাগৰিকত্ব আইন সন্দৰ্ভত চৰকাৰ নিজৰ স্থিতিত অটল বুলি গৃহমন্ত্ৰীগৰাকীয়ে উল্লেখ কৰে ৷
আনহাতে গৃহমন্ত্ৰীগৰাকীয়ে কংগ্ৰেছসহ বিৰোধীৰ নেতাসমূহক এখন যৌথ মঞ্চ গঠন কৰি নাগৰিকত্ব সংশোধনী আইনক লৈ চৰ্চা কৰিবলৈ আহ্বান জনায় ৷ তেওঁ এই ক্ষেত্ৰত প্ৰত্যাহ্বান জনাই কংগ্ৰেছ নেতা ৰাহুল গান্ধী, সমাজবাদী দলৰ অখিলেশ যাদৱ আৰু মায়াৱতী তথা তৃণমুল কংগ্ৰেছৰ মমতা বেনাৰ্জীৰ নাম উল্লেখ কৰে ৷
লগতে অমিত শ্বাহে কংগ্ৰেছক কটাক্ষ কৰি কয় যে, ভোট বেংকৰ ৰাজনীতিয়ে কংগ্ৰেছক অন্ধ কৰি পেলাইছে ৷ দেশ বিভাজনৰ বাবে কংগ্ৰেছেই দায়ী বুলিও মন্তব্য আগবঢ়ায় দেশৰ গৃহমন্ত্ৰী অমিত শ্বাহে ৷
