নিউজ ডেস্ক, ২৩ এপ্ৰিলঃ দিল্লী আৰক্ষীৰ তিলক বিহাৰ আৰক্ষী চকীত কৰ্মৰত ৭০ গৰাকীকৈ কৰ্মচাৰীক আছুতীয়াকৈ থাকিবলৈ নিৰ্দেশনা প্ৰদান কৰিছে দিল্লী গৃহ বিভাগে । আৰক্ষী চকীখনত কৰ্মৰত এগৰাকী আৰক্ষী কনিষ্টবলৰ দেহত কৰ'ণা ভাইৰাছ সৃষ্ট কোভিড-১৯ৰ উপস্থিতি ধৰা পৰাৰ পিচতেই এই নিৰ্দেশনা প্ৰদান কৰা হয় । সেই অনুসৰি, আৰক্ষী চকীখনত কৰ্মৰত ৭০ গৰাকী বিষয়া-জোৱানক ১৪ দিনৰ বাবে আছুতীয়াকৈ থাকিবলৈ কোৱা হৈছে ।
সহকাৰী আৰক্ষী আয়ুক্ত প্ৰমোদ কুশৱাহাই প্ৰকাশ কৰা অনুসৰি, লোধি কলনী আৰক্ষী থানাৰ অন্তৰ্গত এগৰাকী কনিষ্টবল কোভিড-১৯ পজিটিভ ধৰা পৰে । সেই ফালৰ পৰা জোৱানজন কৰ্মৰত তিলক বিহাৰ চকীৰ আটাইকেইগৰাকী বিষয়া কৰ্মচাৰীকে এতিয়া ১৪ দিনৰ বাবে আছুতীয়াকৈ থাকিবলৈ নিৰ্দেশনা প্ৰদান কৰা হৈছে । আৰক্ষীয়ে কনিষ্টবল গৰাকীৰ সংস্পৰ্শলৈ অহা সকলো লোকৰে তথ্য সংগ্ৰহৰ কাম ইতিমধ্যে আৰম্ভ কৰি দিয়া বুলিও আৰক্ষী আয়ুক্তগৰাকীয়ে প্ৰকাশ কৰে ।
বৰ্তমান সময়লৈকে দিল্লীত ২১৫৬ গৰাকী কোভিড-১৯ পজিটিভ পোৱা গৈছে আৰু ৪৭ গৰাকী মৃত্যুমুখত পৰিছে ।
