নতুন দিল্লী, 4 নৱেম্বৰ: সৰ্বকালৰ অভিলেখ ভংগ কৰি দিল্লী-এন চি আৰ অঞ্চলত বায়ু প্ৰদূষণ সূচী (Air Quality Index)য়ে স্পৰ্শ কৰিলে 999 ৰ অংক ৷ ই হৈছে তিনি বছৰৰ সৰ্বাধিক, যাৰ বাবে দিল্লীৰ বতাহক ইতিমধ্যে বিপদজনক বুলি ঘোষণা কৰা হৈছে ৷ সোমবাৰে স্বাস্থ্য বিভাগৰ প্ৰধান সঞ্চালকে কিছু স্বাস্থ্য সম্বন্ধীয় নিৰ্দেশনা জাৰি কৰিছে ৷ এই নিৰ্দেশনাত প্ৰধানকৈ ৰাইজক ঘৰৰ ভিতৰতে থাকিবলৈ পৰামৰ্শ দিয়া হৈছে ৷
ই টিভিক দিয়া এক সাক্ষাৎকাৰত প্ৰধান সঞ্চালক ডাঃ অশোক কুমাৰে কয় যে, ‘আমি এখন স্বাস্থ্য সম্বন্ধীয় নিৰ্দেশনা জাৰি কৰিছো যাৰ দ্বাৰা সাধাৰণ জনতা উপকৃত হ'ব ৷ এই নিৰ্দেশনাত বিশেষকৈ দুৰ্বল লোকসকলক যিমান পাৰে সিমান সতৰ্কতা অৱলম্বন কৰিবলৈ কোৱা হৈছে ৷ নিজক স্বাস্থ্যবান কৰি ৰাখিবলৈ তেঁওলোকে যিমান পাৰে প্ৰদূৰ্ষণৰ সংস্পৰ্শলৈ নাহিব’ বুলি পৰামৰ্শ আগবঢ়োৱা হৈছে ৷
বায়ু প্ৰদূৰ্ষণৰ স্তৰ দিল্লীত গম্ভীৰ হৈ পৰাৰ লগে লগে ই বহু লোকৰ বাবে ৰোগৰ কাৰণ হৈ পৰিব বুলি অনুমান কৰা হৈছে ৷ এই প্ৰদূষণে মানুহৰ বাবে শ্বাস প্ৰশ্বাস জনিত ৰোগৰ কাৰণ হ'ব ৷ অতি কম সময়ৰ বাবে এই প্ৰদূষিত বায়ুত উশাহ-নিশাহ ল'লেও ৰাইজৰ ক্ষতি হ'ব বুলি আশংকা কৰা হৈছে ৷ বৃদ্ধ, 5 বছৰৰ তলৰ শিশু আৰু গৰ্ভাৱতী মহিলা সকলক এি বায়ুৱে বিশেষভাবে ক্ষতি কৰিব ৷
এই নিৰ্দেশনাত ৰাইজক ৰন্ধন কাৰ্যৰ বাবে ধোঁৱা বিহীন ইন্ধনৰ ব্যৱহাৰ কৰিবলৈ আহ্বান জনোৱা হৈছে ৷ ইয়াৰ লগতে সোমবাৰৰ পৰা দিল্লীত কাৰ্যকৰী কৰা হ'ল যুগ্ম-অযুগ্ম সংখ্যাৰ সূ্ত্ৰ ৷ ৰাজধানীত বাহন চলাচল কৰাৰ ক্ষেত্ৰত 15 নৱেম্বৰলৈ বাহাল থাকিব এই ব্যৱস্থা ৷ 4 নৱেম্বৰত যুগ্ম-অযুগ্ম সংখ্যাৰ সূত্ৰৰ আৰম্ভণি হোৱা বাবে সোমবাৰে দিল্লীৰ ৰাজপথত কেৱল যুগ্ম নম্বৰৰ বাহনহে দেখা যাব ৷ পুৱা 8 বজাৰ পৰা দিল্লীত কাৰ্যকৰী কৰা হৈছে যুগ্ম-অযুগ্ম সংখ্যাৰ নিয়ম ৷
লগতে পঢ়ক: দিল্লীত কাৰ্যকৰী কৰা হ'ল যুগ্ম-অযুগ্ম সংখ্যাৰ সূত্ৰ
উল্লেখযোগ্য যে, দেওবাৰে দিল্লীৰ আকাশ নিম্ন দৃশ্যমানৰ হোৱা বাবে বিমান চলাচলত প্ৰভাৱ পৰা দেখা গ'ল ৷ 32 খনকৈ বিমানৰ গতিপথ সলনি কৰিলে দিল্লী বিমানবন্দৰ কৰ্তৃপক্ষই ৷ নতুনকৈ ঘোষণা কৰা বিমানৰ সময় তথা অন্যান্য তথ্য সন্দৰ্ভত বিমানবন্দৰ কৰ্তৃপক্ষৰ সৈতে যোগাযোগ কৰিবলৈও যাত্ৰীসকলক পৰামৰ্শ দিয়া হৈছে ৷ দেশৰ ৰাজধানীত বায়ুৰ গুণগত মানদণ্ড নিকৃষ্ট পৰ্যায়ৰ বুলি ঘোষণা হোৱাৰ পাচতে এই সিদ্ধান্ত গ্ৰহণ কৰিছে বিমানবন্দৰ কৰ্তৃপক্ষই ৷ ডাঠ কুঁৱলীয়ে দিল্লীৰ বায়ুমণ্ডল আৱৰি ধৰাৰ লগতে দিল্লীবাসীয়ে স্বাস্থ্যজনিত সমস্যাতো ভুগিছে ৷ আনহাতে, দেওবাৰৰ পুৱা 10 বজাৰ পৰা দিল্লীত বায়ু প্ৰদূষণৰ সূচী (Air Quality Index) সৰ্বাধিক 625 হোৱা পৰিলক্ষিত হয় ৷ উল্লেখ্য যে, 500 তকৈ অধিক বায়ু প্ৰদূষণৰ সূচী হ'লে ইয়াক 'গম্ভীৰ তথা জৰুৰীকালীন' বুলি গণ্য কৰা হয় ৷ ধীৰপুৰত 509, দিল্লী বিশ্ববিদ্যালয়ত 591, বিখ্যাত চান্দনী চৌকত 432 আৰু লোধী অঞ্চলত 537 বায়ু প্ৰদূষণৰ সূচী (AQI) প্ৰত্যক্ষ কৰা হৈছে ৷
