মুম্বাই, ২৪ মে': মহাৰাষ্ট্ৰত অব্যাহত আছে কৰ'ণা ভাইৰাছৰ ভয়াৱহতা । শনিবাৰে ৰাজ্যখনৰ শেহতীয়া পৰিস্থিতি সন্দৰ্ভত তৃতীয়বাৰৰ বাবে এক পৰ্যালোচনা বৈঠকত মিলিত হয় ৰাজ্যখনৰ মুখ্য়মন্ত্ৰী উদ্ধৱ থাকৰে আৰু নেশ্যনেল কংগ্ৰেছ দলৰ সভাপতি শাৰদ পাৱাৰ । এই বৈঠকত মুখ্য়মন্ত্ৰীৰ লগতে ৰাজ্যিক জল-উৎস মন্ত্ৰী জয়ন্ত পাটিল, শিৱ সেনাৰ ৰাজ্যসভাৰ সাংসদ সঞ্জয় ৰাৱট, মুখ্য় সচিব অজয় মেহতাও উপস্থিত থাকে ।
এই বৈঠকত এনচিপি প্ৰধানে পৰ্যায় ক্ৰমে ৰাজ্যত অৰ্থনৈতিক কাৰ্য-কলাপৰ লগতে যাতায়ত চলাচল পুনৰ আৰম্ভ কৰাৰ ওপৰত অধিক জোৰ প্ৰদান কৰে । লগতে পাৱাৰে আমদানি, ৰপ্তানি, আভ্যন্তৰীণ নৌ-পৰিৱহন বৃদ্ধিৰ বাবেও উদ্যোগপতি বিশেষজ্ঞৰ সৈতে এই বিষয়ে আলোচনা কৰাৰ ওপৰতো অধিক প্ৰাধান্য দিয়া দেখা পোৱা যায় ।
উল্লেখ্য় যে, মহাৰাষ্ট্ৰত দেশৰ ভিতৰতে আটাইতকৈ বেছি সংক্ৰমিত হৈছে কৰ'ণা ভাইৰাছ । ৰাজ্যখনত বৰ্তমানলৈকে ৪৭,১৯০ জন লোক আক্ৰান্ত হোৱাৰ বিপৰীতে মৃত্যুমুখত পৰিছে ১,৫৭৭ জন লোক । আনহাতে মহাৰাষ্ট্ৰত এতিয়াও সক্ৰিয় হৈ আছে ৩২,২০৯ টা ঘটনা ।
