নেশ্যনেল ডেস্ক, 9 মাৰ্চ : সোমবাৰে বাংগালুৰুৰ এজন লোক কৰ'ণাভাইৰাছত আক্ৰান্ত হোৱাৰ তথ্য প্ৰকাশ পোৱাৰ পাচতে ভাৰতত আক্ৰান্তৰ সংখ্য 44 জনলৈ বৃদ্ধি পাইছে ৷ কৰ্ণাটকৰ চিকিৎসা শিক্ষা বিজ্ঞান বিভাগৰ মন্ত্ৰী কে. সুধাকৰে জানিবলৈ দিয়া অনুসৰি আক্ৰান্ত ব্যক্তিজনে আমেৰিকা ভ্ৰমণ কৰিছিল ৷
উল্লেখ্য যে, মঙলবাৰৰ পৰা অনিৰ্দিষ্ট সময়লৈ বাংগালুৰুৰ সকলোবোৰ প্ৰাথমিক বিদ্যালয় বন্ধ ঘোষণা কৰা হৈছে ৷ আনহাতে, মহিলা আৰু শিশু বিকাশ মন্ত্ৰণালয়েও ৰাজ্যখনৰ অংগনবাদীসমূহৰ 7 দিনীয়া বন্ধ ঘোষণা কৰিছে ৷
বৰ্তমানলৈকে বিশ্বৰ 100 খন বিভিন্ন দেশত প্ৰায় 1,10,000 লোক আক্ৰান্ত হোৱাৰ লগতে 3,800 লোকে প্ৰাণ হেৰুৱাইছে ৷ যোৱা বছৰৰ ডিচেম্বৰত এই ভাইৰাছৰ উৎপত্তি ঘটা চীনক ৰোগবিধে সৰ্বাধিক প্ৰভাৱান্বিত কৰিছে ৷ বৰ্তমানলৈকে দেশখনত 80,000 লোক এই ৰোগত আক্ৰান্ত হৈছে ৷ এই ভাইৰাছৰ সংক্ৰমণ ৰোধ কৰিবৰ বাবে ইউৰোপিয়ান দেশৰ লগতে এছিয়ান দেশসমূহতো সাৰ্বজনীন সভা, ক্ৰীড়া ইভেন্ট সমূহত উপস্থিতিত বাধ্যবাধকতা আৰু বিদ্যালয় বন্ধ ঘোষণা কৰা হৈছে ৷
চীনৰ পাচতে সৰ্বাধিকভাৱে প্ৰভাৱান্বিত হৈছে ইটালী ৷ বৰ্তমানলৈকে 7,375 লোক ইটালীত আক্ৰান্ত হোৱাৰ লগতে 366 জন লোকে প্ৰাণ হেৰুৱাইছে ৷ আনহাতে, দক্ষিণ কোৰিয়াত মৃত্যুমুখত পৰিছে 51 জন লোকে ৷
আৰু পঢ়ক : ৰাজনৈতিক অশান্তি : জ্যেষ্ঠ নেতৃত্বৰে মিলিত হ'ব মুখ্যমন্ত্ৰী কমল নাথ
