নিউজ ডেস্ক, 22 মাৰ্চ : শনিবাৰে নিশাৰ ভাগত ছত্তিশগড়ৰ মাও অধ্যুষিত চুকমাত ভয়ংকৰ সংঘৰ্ষত লিপ্ত হৈছিল ৰাজ্যখনৰ জিলা সংৰক্ষিত বাহিনী আৰু মাওবাদীৰ এটা দল ৷ শনিবাৰে নিশাৰ পৰা আৰম্ভ হোৱা এই সংঘৰ্ষৰ পিচতে নিখোজ হৈ আছিল 17গৰাকীকৈ ডিআৰজি জোৱান ৷ অৱশেষত দেওবাৰে দিনত চুকমাৰ ঘন জংঘলৰ ভিতৰৰ পৰা উদ্ধাৰ কৰা হয় 17জনকৈ নিখোজ জোৱানৰ মৃতদেহ ৷ বষ্টৰ ৰেঞ্জৰ আৰক্ষী মহাপৰিদৰ্শক সুন্দৰৰাজ পি.য়ে সংবাদ মাধ্যমৰ আগত এই কথা প্ৰকাশ কৰিছে ৷ ইতিমধ্যে জংঘলৰ মাজৰ পৰা শ্বহীদ জোৱানকেইজনৰ মৃতদেহ উদ্ধাৰ কৰাৰ লগতে মৰনোত্তৰ পৰীক্ষাৰ বাবে প্ৰেৰণ কৰা হৈছে ৷
শনিবাৰে নিশা প্ৰায় 2:30 বজাৰ পৰা চুকমাৰ চিন্তাগুফাৰ কোৰাজগুড়া পাহাৰত সংঘটিত হৈছিল এই সংঘৰ্ষ ৷ প্ৰায় 600ৰো অধিক ডিআৰজি জোৱান, এছটিএফ জোৱান আৰু চিআৰপিএফ কোব্ৰা কামাণ্ডোৱে এই অভিযানত ভাগ লৈছিল ৷ ইলমাগুন্দাত মাওবাদীৰ অৱস্থিতিৰ বিষয়ে তথ্য লাভ কৰাৰ পিচতে চুকমাৰ চিন্তাগুফা, বুৰকাপাল আৰু টিমেলৱাড়াক তিনিওফালৰ পৰা ঘেৰি লৈ বাহিৰ কৰা হৈছিল এই বৃহৎ অভিযান ৷ ইলমাগুন্দাৰ ওচৰৰ কোৰাজগুড়া পাহাৰত মাওবাদীৰ সৈতে মুখামুখি হয় নিৰাপত্তাৰক্ষীৰ অভিযানকাৰী দলটো ৷ আৰক্ষী মহাপৰিদৰ্শক সুন্দৰৰাজ পি.য়ে প্ৰকাশ কৰা তথ্য অনুসৰি, চাৰিৰ পৰা পাঁচগৰাকী নক্সালবাদী এই অভিযানত নিহত হোৱাৰ লগতে সমানসংখ্যক আহত হৈছে ৷ সংঘৰ্ষত প্ৰায় 14 গৰাকী ডিআৰজি জোৱান আহত হোৱাৰ লগতে নিশাই তেওঁলোকক ৰায়পুৰস্থিত চিকিৎসালয়লৈ এয়াৰলিফ্ট কৰা হৈছিল বুলি জনায় আৰক্ষী মহাপৰিদৰ্শকগৰাকীয়ে ৷
উল্লেখ্য যে, মাও অধ্যুষিত ছত্তিশগড়ত নিৰাপত্তা বাহিনীৰ ওপৰত চলিত বৰ্ষৰ এয়া হৈছে প্ৰথমটো ভয়ংকৰ আক্ৰমণ ৷ ইয়াৰ পূৰ্বেও চুকমা জিলাত মাওবাদীৰে সৈতে নিৰাপত্তাৰক্ষীয়ে বহুবাৰ সংঘৰ্ষত লিপ্ত হোৱাৰ লগতে বহুটো জোৱান শ্বহীদ হৈছিল ৷
2010 চনৰ 6 এপ্ৰিলত সংঘটিত হৈছিল শতিকাৰ আটাইতকৈ ভয়ংকৰ আক্ৰমণটো য'ত চিআৰপিএফৰ 75 গৰাকী বিষয়া আৰু জোৱান শ্বহীদ হৈছিল ৷ ৰাজধানী ৰায়পুৰৰ পৰা 540 কিলোমিটাৰ নিলগৰ মুকৰানা জংঘলত সংঘটিত হৈছিল এই আক্ৰমণ ৷ ইয়াৰ প্ৰায় চাৰিবছৰ পিচত এই অঞ্চলটো মাওবাদ মুক্ত ঘোষণা কৰাৰ লগতে ৰাষ্ট্ৰীয় পতাকা উত্তোলন কৰিছিল চিআৰপিএফে ৷
2014 চনৰ 11 মাৰ্চত চুকমাৰ জেৰাম ঘাটিৰ টংপাল গাঁৱত একেই ভয়ংকৰ আক্ৰমণ সংঘটিত হৈছিল চিআৰপিএফ আৰু ৰাজ্যিক আৰক্ষীৰ ওপৰত ৷ প্ৰায় 100 গৰাকী নক্সালবাদীয়ে চাৰিওফালৰ পৰা ঘেৰি লৈ সংঘটিত কৰা এম্বুশ্বত শ্বহীদ হৈছিল 15 গৰাকী নিৰাপত্তা বাহিনীৰ জোৱান ৷
2014 চনৰ 1 ডিচেম্বৰত চুকমাৰ কাছলপাৰা গাঁৱত চিআৰপিএফৰ ওপৰত সংঘটিত আক্ৰমণত দুগৰাকী বিষয়াকে ধৰি শ্বহীদ হৈছিল 14গৰাকীকৈ চিআৰপিএফ জোৱান ৷ এই সংঘৰ্ষত ছয়গৰাকী নক্সালবাদীও নিহত হৈছিল ৷
2017 চনৰ 11 মাৰ্চত চুকমাত এটা পথ পৰিবহন সংস্থাক নিৰাপত্তা প্ৰদান কৰি থকা অৱস্থাত 100 গৰাকী চিআৰপিএফ জোৱানৰ ওপৰত সংঘটিত হৈছিল এক ভয়ংকৰ এম্বুশ্ব ৷ এই আক্ৰমণত 12 গৰাকীকৈ চিআৰপিএফ জোৱান শ্বহীদ হৈছিল ৷ এই ঘটনাৰ প্ৰায় এমাহ পিচত এপ্ৰিলৰ 24 তাৰিখে আন এক আক্ৰমণ সংঘটিত কৰিছিল মাওবাদীয়ে, য'ত 25 গৰাকী চিআৰপিএফ জোৱান শ্বহীদ হোৱাৰ লগতে 7 গৰাকী আহত হৈছিল ৷ চিআৰপিএফৰ 74 বেটালিয়নৰ ওপৰত চুকমাৰ বুৰকপাল কেম্পত সংঘটিত হোৱা এই আক্ৰমণত 12 গৰাকী মাওবাদী নিহত হৈছিল ৷
