নিউজ ডেস্ক,9 জানুৱাৰী : ভাৰত-বাংলা সীমান্তত বি এছ এফৰ জোৱানক আক্ৰমণ বাংলাদেশী দুৰ্বৃত্তৰ ৷ বুধবাৰে নিশা প্ৰায় 12.30 মান বজাত বি এছ এফৰ এটা সীমান্ত পহৰা চকীত এটা বাংলাদেশী দুৰ্বৃত্তৰ দলে আক্ৰমণ চলায় দুজন জোৱানৰ পৰা অস্ত্ৰ কাঢ়ি লয় ৷ আন এটা দুৰ্বৃত্তৰ দলে সীমান্তৰ এটা পৰিয়ালৰ পৰা ধনৰ লগতে কিছু পৰিমাণৰ অস্ত্ৰ-শস্ত্ৰ চুৰি কৰি নিয়ে বুলি আৰক্ষী সূত্ৰত প্ৰকাশ ৷ মেঘালয়ৰ ভাৰত-বাংলা সীমান্তৰ পৰা 5 কিলোমিটাৰ দূৰত অৱস্থিত আমদহ আৰু ৰংটিলা অঞ্চলত সংঘটিত হৈছে এই ঘটনা ৷
ৰংটিলা সীমান্ত পহৰাচকীৰ সমীপত দুজন বি এছ এফ জোৱানক আগুৰি ধৰে প্ৰায় 10-15 জনীয়া বাংলাদেশী দুৰ্বৃত্তৰ দলটোৱে ৷ জোৱান দুজনক আক্ৰমণ কৰি তেওঁলোকৰ পৰা বন্দুক দুটা কাঢ়ি লয় ৷ পশ্চিম জয়ন্তীয়া জিলাৰ আৰক্ষী অধীক্ষক লাকডৰ চিমে জনোৱা মতে এই ঘটনাত এজন জোৱান আহত হয় ৷ দুৰ্বৃত্তই কাঢ়ি লোৱা বন্দুক দুটা পৰৱৰ্তী সময়ত কাষৰ জংঘলত উদ্ধাৰ কৰে আৰক্ষীয়ে ৷
আনহাতে,বাংলাদেশী দুৰ্বৃত্তৰ আন এটা দলে আমদহ গাঁৱৰ প্ৰতাপ বাৰেহ নামৰ লোকজনৰ ঘৰত বলপূৰ্বক প্ৰৱেশ কৰি নগদ ধন,ম'বাইলৰ লগতে লুটি লৈ যায় এটা এছ বি বি এল বন্দুক ৷ প্ৰতাপ বাৰেহে আত্মৰক্ষাৰ বাবে এজাঁই গুলী ফুটাই যদিও দুৰ্বৃত্তই তেওঁৰ পৰা বন্দুক কাঢ়ি লৈ আক্ৰমণ কৰে ৷ আৰক্ষী অধীক্ষক চিমে জনোৱা মতে,আহত বি এছ এফ জোৱানজন আৰু প্ৰতাপ বাৰেহক ততাতৈয়াকৈ ডাউকী প্ৰাথমিক স্বাস্থ্যকেন্দ্ৰত ভৰ্তি কৰোৱা হয় ৷
আৰক্ষী উপ মহাপৰিদৰ্শকৰ লগতে জিলা আৰক্ষী আয়ুক্ত আৰু বি এছ এফৰ উচ্চপদস্থ বিষয়াসকল ঘটনাস্থলীত উপস্থিত হৈ সামগ্ৰিক পৰিস্থিতি সম্বন্ধে বুজ লয় ৷ ভাৰতৰ বি এছ এফৰ দলে কিছুদিন পূৰ্বে বাংলাদেশ সীমান্তৰক্ষী বাহিনীৰ সৈতে হোৱা এখন বৈঠকত বাংলাদেশী দুৰ্বৃত্তৰ সন্দৰ্ভত প্ৰতিবাদ জনাইছিল ৷ বাংলাদেশৰ সীমান্ত সুৰক্ষা বাহিনীয়ে কোনো দুৰ্বৃত্তই আন্তঃৰাষ্ট্ৰীয় সীমাত প্ৰৱেশ কৰি আইন-শৃংখলা জনিত পৰিস্থিতিৰ সৃষ্টি কৰিব নোৱাৰাকৈ পহৰাৰ ব্যৱস্থা কৰা হ'ব বুলি প্ৰতিশ্ৰুতি প্ৰদান কৰাৰ কথা উল্লেখ কৰে এগৰাকী বি এছ এফৰ বিষয়াই ৷ যোৱা সপ্তাহতো ভাৰতীয় সীমাৰ প্ৰায় দহ কিলোমিটাৰ ভিতৰত সন্দেহযুক্ত বাংলাদেশী দুৰ্বৃত্তৰ এটা দলে এখন বাহনত আক্ৰমণ চলায় গৰাকীৰ পৰা ধন আৰু ম'বাইল লুটি নিয়াৰ ঘটনা সংঘটিত হৈছিল ৷ বি এছ এফ জোৱান আৰু গাঁওবাসীক আক্ৰমণ কৰা ঘটনাক তীব্ৰ ভাষাৰে গৰিহণা জনায় বি এছ এফ বিষয়াগৰাকীয়ে ৷
