কৰ্ণাটক, 24 জুলাই : কৰ্ণাটকৰ কালাবুৰাগী জিলাৰ ভৱানী চহৰত কৰ'ণাত আক্ৰান্ত হোৱাৰ খবৰ লাভ কৰাৰ পাচতেই মৃত্যুক সাৱতি লয় এজন অট' চালকে ৷ অশোক নামৰ অট' চালকজনৰ জোঁৱায়েক কৰ'ণাত আক্ৰান্ত হোৱাৰ পাচত 8 জুলাইত অশোকৰ লগতে পৰিয়ালৰ লোকে কৰ'ণাৰ পৰীক্ষণ কৰে ৷
অশোকৰ কৰ'ণা ফলাফল পজিটিভ আহে ৷ স্বাস্থ্য বিভাগৰ পৰা ফোনযোগে এই কথা অৱগত হোৱাৰ পাচতেই ঢলি পৰি মৃত্যু হয় অট' চালকজনৰ ৷ অশোকৰ মৃত্যুৰ পাচত মৰণোত্তৰ পৰীক্ষাৰ বাবে প্ৰেৰণ কৰা হয় ৷ মৰণোত্তৰ পৰীক্ষাত অশোকৰ কৰ'ণাৰ ফলাফল নিগেটিভ আহে ৷
বৰ্তমান সমগ্ৰ দেশতে কৰ'ণা মহামাৰীয়ে ত্ৰাসৰ সৃষ্টি কৰিছে ৷ কৰ'ণাত আক্ৰান্ত হৈ বহু লোকে মৃত্যুক সাৱতি লোৱাৰ সময়তে একাংশ লোকে কৰ'ণা ভয়তেই আত্মহননৰ দৰে পথ বাচি লৈছে ৷ কিছুদিন পূৰ্বে হায়দৰাবাদত এজন যুৱকে কৰ'ণাত আক্ৰান্ত হোৱাৰ পাচত হুছেইন সাগৰত জপিয়াই আত্মহত্যা কৰে ৷ মুম্বাইতো এজন কৰ'ণাত আক্ৰান্ত ৰোগীয়ে চিকিৎসালয়ৰ ছাদৰ পৰা জপিয়াই আত্মহত্যা কৰে ৷
লগতে পঢ়ক : ছেকটেং : ভূটানৰ সৈতে কূটনৈটিক সম্পৰ্ক স্থাপনৰ বাবে চীনৰ ন কৌশল !
