নিউজ ডেস্ক, 22 মে': প্ৰৱজিত শ্ৰমিক সকলে কোনো কষ্ট নোপোৱাকৈ নিজ ৰাজ্যত উপস্থিত হ'বৰ বাবে প্ৰশাসনক ব্যৱস্থা গ্ৰহণ কৰিবলৈ নিৰ্দেশ তেলেংগানা চৰকাৰৰ । সেই অনুসৰি ৰাজ্যখনৰ মুখ্যমন্ত্ৰী কে চন্দ্ৰশেখৰ ৰাওৱে প্ৰশাসনক প্ৰদান কৰা নিৰ্দেশনা অনুসৰি, কোনো প্ৰৱজিত শ্ৰমিক খোজ কাঢ়ি ঘৰলৈ যাব লগীয়া হ'ব নালাগে । সেয়েহে তেওঁলোকৰ বাবে বাছ অথবা ৰে'লৰ ব্যৱস্থা কৰিবলৈ তেওঁ মুখ্য সচিবক নিৰ্দেশ দিছে ।
প্ৰৱজিত শ্ৰমিকক ঘৰলৈ পঠিওৱাৰ দায়িত্ব লৈছে তেলেংগানাৰ চৰকাৰে । লগতে তেওঁৰ ৰাজ্যৰো কোনো শ্ৰমিকক যাতে খোজ কঢ়াই ঘৰলৈ নপঠিয়াই তাৰ বাবে তেওঁ আন ৰাজ্যসমূহক আহ্বান জনাইছে ৷ ৰাজ্যখনে ইতিমধ্যে 75 খন শ্ৰমিক ৰে'লৰ ব্যৱস্থা কৰাৰ কথা জনাইছে আৰু ইয়াৰ বাবে 6 কোটি টকা ব্যয় হোৱাৰ কথা প্ৰকাশ কৰিছে মুখ্যমন্ত্ৰীৰ পুত্ৰ তথা পৌৰ-প্ৰশাসন মন্ত্ৰী কে টি ৰামা ৰাওৱে ।
