নাগৰিকত্ব সংশোধনী আইনৰ বিৰুদ্ধে দিল্লী উত্তাল কৰিলে অসমীয়াই

নাগৰিকত্ব সংশোধনী আইনৰ বিৰুদ্ধে জন্তৰ মন্তৰত প্ৰতিবাদ সাব্যস্ত কৰে দিল্লীস্থিত অসমীয়াই ৷ হাতে হাতে প্লে' কাৰ্ড লৈ পৰিৱেশ উত্তাল কৰি তোলে প্ৰতিবাদকাৰীয়ে ৷

নেশ্যনেল ডেস্ক,14 ডিচেম্বৰ : দেশৰ ৰাজধানী দিল্লীত শনিবাৰে নাগৰিকত্ব সংশোধনী আইনৰ বিৰুদ্ধে আন্দোলনত শ শ অসমীয়াই জন্তৰ মন্তৰত অংশগ্ৰহণ কৰে ৷ হাতে হাতে প্লে' কাৰ্ড লৈ প্ৰতিবাদকাৰীসকলে বিভিন্ন শ্লোগানেৰে পৰিৱেশ উত্তাল কৰি তোলে৷ "কেব ঘূৰাই লওক", "আমি কেব নিবিচাৰো", "আমাৰ পৰিচয় ৰক্ষা কৰক" আদি বিভিন্ন দাবীৰে প্ৰতিবাদস্থলী উত্তাল কৰি তোলে বিভিন্ন কলেজ তথা কাৰ্যালয়ত কৰ্মৰত দিল্লীস্থিত অসমীয়াই ৷

এজন প্ৰতিবাদকাৰীয়ে কয়, "আমি কেতিয়াও কেব গ্ৰহণ নকৰো ৷ এয়া অসাংবিধানিক আৰু এই আইনে আমাৰ সংস্কৃতি আৰু পৰিচয়ত ব্যাঘাত জন্মাব ৷"

আন এজনে কয়,"ভাৰতৰ অন্য প্ৰান্তৰ লোকে ভাবিছে আমি মুছলিমৰ বিৰুদ্ধে যুদ্ধ কৰিছো ৷ কিন্তু মুছলিম বন্ধুৰ বিৰুদ্ধে আমাৰ কোনো ধৰণৰ আক্ৰোশ নাই ৷ আমি অসমৰ খিলঞ্জীয়া লোকৰ অধিকাৰৰ বাবে যুঁজি আছো ৷ আমাৰ ৰাজ্যতে বাংলাদেশীসকলে আমাক সংখ্যালঘু কৰি দিব বুলিহে আমি চিন্তিত ৷"

আৰু এজনে কয়,"আমাৰ পৰিচয়,সংস্কৃতি আৰু পৰম্পৰা তথা ঐতিহ্যত আঘাত জন্মোৱা এই কেব চৰকাৰে ঘূৰাই ল'বলৈ দাবী কৰিছো ৷"

আৰু পঢ়ক : গোলাঘাটৰ সৰুপথাৰত শূন্যলৈ গুলিচালনা আৰক্ষীৰ