নিউজ ডেস্ক, 9 ডিচেম্বৰ: গৃহমন্ত্ৰী অমিত শ্বাহে লোকসভাত নাগৰিকত্ব সংশোধনী বিধেয়ক উত্থাপন কৰাৰ পৰিপ্ৰেক্ষিতত বিধেয়কখনৰ বিৰোধিতাৰে দিল্লীৰ যন্তৰ-মন্তৰত প্ৰতিবাদ সাব্যস্ত কৰে AIUDF দলৰ নেতৃত্বৰ লগতে তৃণমূল পৰ্যায়ৰ কৰ্মীসকলে ৷ সোমবাৰে বিধেয়কখনৰ বিৰোধিতা কৰি অসমীয়াৰ হকে থিয় দিয়ে জ্যেষ্ঠ AIUDF ৰ নেতা তথা অসম বিধানসভাৰ বিধায়ক ড0 হাফিজ ৰফিকুল ইছলামে ৷ বিধায়কগৰাকীয়ে বিধেয়কখনক অগণতান্ত্ৰিক বুলি মন্তব্য কৰি বিশাল জন সমৰ্থন উলিয়াই বিধেয়কখনৰ বিৰোধিতা কৰে ৷
লগতে পঢ়ক: লোকসভাত উত্থাপন জাতিধ্বংসী কেবঃ LIVE NEWS
বিধায়কগৰাকীৰ ভাষ্য অনুসৰি " নাগৰিকত্ব সংশোধনী বিধেয়কখন সম্পূৰ্ণৰূপে অসম বিৰোধী ৷ এই বিধেয়কখন গৃহিত হ'লে অসমীয়া ভাষালৈ সংকটত অহাৰ লগতে অসমৰ সংস্কৃতি আৰু সভ্যতাও সম্পূৰ্ণৰূপে ধ্বংস হ'ব ৷ চৰকাৰে প্ৰথমে এন আৰ চি আনিলে,এন আৰ চি প্ৰায় প্ৰস্তুত হোৱাৰ লগে লগে চৰকাৰে বিধেয়কখন গৃহীত কৰিব বিচাৰিছে ফলস্বৰূপে এন আৰ চি সম্পূৰ্ণৰূপে অৰ্থহীন হৈ পৰিছে ৷ অসমৰ মুখ্যমন্ত্ৰী সোণোৱালে গাদীৰ স্বাৰ্থত নাগপুৰ আৰু কেন্দ্ৰৰ আগত আঠু ল'লে ৷ অসমীয়াই 1971 চনৰ পিচৰ এজনো লোকে অসমত স্থান পোৱাটো নিবিচাৰে কিন্তু বিধেয়ক গৃহীত হ'লে প্ৰতিজন অসমীয়াই বহিৰাগতৰ স'তে নিজ অধিকাৰৰ ভাগ-বতৰা কৰিব লাগিব ৷"
ইয়াৰোপৰি হাফিজ ৰফিকুল ইছলামে সাংবাদিকৰ আগত কয় যে "বিজেপিয়ে লোকসভাত বিধেয়কখনৰ ক্ষেত্ৰত সফল হ'লেও ৰাজ্যসভাত আমি অন্য দলসমূহক বিধেয়কখনৰ বিৰোধিতা কৰিবলৈ আবেদন জনাম ৷ বিপক্ষৰ কংগ্ৰেছ দলেও এই বিধেয়কখনক অসংবিধানিক বুলি গণ্য কৰে ৷"
উল্লেখ্য যে, যিদিনা অমিত শ্বাহে লোকসভাত বিধেয়কখন উত্থাপন কৰিছিল উক্ত দিনটোত সদনৰ ভিতৰৰ লগতে বাহিৰতো প্ৰতিবাদৰ জোৱাৰ উঠিছিল ৷
