নতুন দিল্লী,15 অক্টোবৰ: কেন্দ্ৰীয় অসামৰিক বিমান পৰিবহণ মন্ত্ৰী হৰদ্বীপ পুৰীয়ে জৰুৰীকালীন সময়ছোৱাত এয়াৰ ইণ্ডিয়াৰ এগৰাকীও কৰ্মচাৰীক চাকৰিৰ পৰা বৰ্খাস্ত নকৰাৰ বিষয়ে প্ৰকাশ কৰিছে ৷ যি নিসন্দেহে এক ভাল খবৰ ৷ বিগত সময়ত ঘৰুৱা বা আন্তঃৰাষ্ট্ৰীয় সকলো ক্ষেত্ৰতে ই প্ৰযোজ্য হৈছিল ৷ ৰাজ্যসভাৰ সাংসদ বিনয় বিস্যামলৈ প্ৰেৰণ কৰা এক পত্ৰত পুৰীয়ে বিমান সেৱাৰ ক্ষেত্ৰত সৃষ্টি হোৱা আৰ্থিক দুৰৱস্থাৰ বিষয়ত এনেদৰে উল্লেখ কৰে ৷ কিন্তু সেৱা অব্যাহত ৰাখিবলৈ বিভিন্ন পন্থা অৱলম্বন কৰাৰ কথা জানিবলৈ দিয়ে পুৰীয়ে ৷
এয়াৰ ইণ্ডিয়াই প্ৰতিগৰাকী কৰ্মচাৰীক চলিত বৰ্ষৰ জুন মাহতো বেতন দিয়াৰ কথা প্ৰকাশ কৰে ৷ যি সময়ত কোভিড 19 ৰ বাবে বিমান খণ্ডত তীব্ৰ প্ৰত্যাহ্বান সৃষ্টিৰ লগতে আৰ্থিক সমস্যাৰ উদ্ভৱ হৈছিল ৷ পুৰীয়ে প্ৰকাশ কৰা অনুসৰি, এল ডব্লিউ পি আঁচনিৰ কৰ্মচাৰীসকলক কোম্পানীৰ সৈতে জড়িত থকাৰ স্বাৰ্থত কৰ্তৃপক্ষৰ অনুমোদন সাপেক্ষে নিৰ্ধাৰিত সময়ৰ বাবে কাৰ্যালয়ৰ দায়িত্বৰ লগতে ছুটীৰ ব্যৱস্থা কৰে ৷ ঘৰুৱা আৰু আন্তঃৰাষ্ট্ৰীয় সকলো প্ৰকাৰৰে বিমান সেৱা খণ্ডৰ কৰ্মচাৰীসকলৰ ক্ষেত্ৰত এই নীতি প্ৰযোজ্য কৰা হৈছিল ৷
উল্লেখ্য যে, বিগত প্ৰায় ছমাহ পূৰ্বে বিশ্বত ভয়াৱহ ৰূপ ধাৰণ কৰা কোভিড 19 ৰ ফলত স্তব্ধ হৈ ৰৈছিল বিমান সেৱা ৷ যাৰ বাবে বৃহৎ পৰিমাণৰ লোকচানৰ সন্মুখীন হৈছিল বিমান খণ্ড ৷ এই সময়ছোৱাত বহু লোকে চাকৰি হেৰুওৱা দেখা গৈছিল ৷ কিন্তু বিমান খণ্ডত দেখা দিয়া তীব্ৰ আৰ্থিক মন্দাৱস্থা নেওচি কৰ্তৃপক্ষই কৰ্মচাৰীসকলক বেতন প্ৰদান কৰাৰ লগতে এগৰাকী কৰ্মচাৰীকো চাকৰিৰ পৰা বৰ্খাস্ত নকৰাৰ ঘটনাই সুকীয়া তাৎপৰ্য বহন কৰিছে ৷
লগতে চাওকঃ দ্বি-পাক্ষিক সম্পৰ্কক লৈ ভাৰত-পৰ্তুগালৰ মাজত বৈঠক
