নিউজ ডেস্ক, 25 জুুনঃ আইন-শৃংখলাৰ চূড়ান্ত অৱনতি ঘটিছে চুবুৰীয়া পশ্চিমবংগত ৷ শেহতীয়াকৈ ৰাজ্যখনত ব্যাপক হাৰে বৃদ্ধি পাইছে বিভিন্ন অপৰাধমূলক ঘটনা ৷
পুনৰবাৰ এক ভয়ংকৰ বিপদৰ পৰা ৰক্ষা পৰে ৰাজ্যখনৰ দূৰ্গাপুৰ অঞ্চল ৷ আৰক্ষীৰ বিশেষ শাখাই লাভ কৰা তথ্যৰ ভিত্তিত স্থানীয় শান্তি নগৰৰ এটি নিৰ্মীয়মান অট্টালিকাৰ পৰা উদ্ধাৰ হয় 18টাকৈ শক্তিশালী ক্ৰূড বোমা ৷ ঘৰটোৰ ভিতৰত থকা দুটা ড্ৰামৰ ভিতৰত লুকাই থোৱা অৱস্থাত উদ্ধাৰ হয় বোমাকেইটা ৷ পৰৱৰ্তী সময়ত আৰক্ষীৰ বোমা নিয়ন্ত্ৰণ গোটে এক পৰিত্যক্ত অঞ্চলত কোনো হানি-বিঘিনি নোহোৱাকৈ বোমাকেইটা নিষ্ক্ৰিয় কৰে ৷ ঘটনা সন্দৰ্ভত আৰক্ষীয়ে বৰ্তমানলৈ কোনো মন্তব্য কৰাৰ পৰা বিৰত আছে ৷
উল্লেখ্য যে, বিগত 20 জুনত টিএমচি আৰু বিজেপি কৰ্মীৰ মাজত সংঘটিত হোৱা হিংসাত্মক ঘটনাৰ পিচতে আৰক্ষীয়ে উক্ত স্থানৰ পৰা উদ্ধাৰ কৰিছিল ষাঠীটাকৈ ক্ৰুড বোমা ৷ ভাটপাৰাত সংঘটিত হোৱা হিংসাত্মক ঘটনাত দুজন লোক নিহত হোৱাৰ বিপৰীতে বহুসংখ্যক লোক আহত হৈছিল আৰু আইন-শৃংখলা নিয়ন্ত্ৰণ কৰিবলৈ পশ্চিমবংগ আৰক্ষীয়ে সান্ধ্য আইন জাৰি কৰিছিল ৷
