নিউজ ডেস্ক, ১২ মে' : কোভিড-১৯ মহামাৰীৰ ফলত ফিলিপাইছনত আৱদ্ধ হৈ পৰা ভাৰতীয় শিক্ষাৰ্থীৰ এটা দল মঙলবাৰে আহমেদাবাদত উপস্থিত হয় । বিশেষ বিমানেৰে এইদৰে দেশত আহি উপস্থিত হয় শিক্ষাৰ্থীৰ দলটো । গুজৰাট চৰকাৰে সংবাদমাধ্যমৰ আগত এই তথ্য প্ৰকাশ কৰিছে ।
লকডাউনৰ তথা আন্তঃৰাষ্ট্ৰীয় বিমানৰ চলাচল বন্ধ হৈ পৰাৰ ফলত এইদৰে ফিলিপাইনছৰ ৰাজধানী মেনিলাত আৱদ্ধ হৈ আছিল শিক্ষাৰ্থীৰ দলটো । দলটোত সৰ্বমুঠ ১৩৯ গৰাকী শিক্ষাৰ্থী আছিল আৰু উচ্চ শিক্ষাৰ বাবে ফিলিপাইনছলৈ গৈছিল । গুজৰাট চৰকাৰে প্ৰকাশ কৰা তথ্য অনুসৰি, শিক্ষাৰ্থীৰ দলটোত থকা সদস্যসকলক নিজ নিজ গৃহ জিলালৈ প্ৰেৰণ কৰা হৈছে আৰু তেওঁলোকক ১৪ দিনৰ আনুষ্ঠানিক কোৱাৰেন্টাইনত থাকিবলৈ কোৱা হৈছে ।
গুজৰাট চৰকাৰে প্ৰকাশ কৰা তথ্য অনুসৰি, ৰাজ্যখনৰ হাজাৰৰো অধিক শিক্ষাৰ্থী বিশ্বৰ বিভিন্ন প্ৰান্তত আৱদ্ধ হৈ আছে ।
শেহতীয়াকৈ কেন্দ্ৰীয় চৰকাৰে "বন্দে ভাৰত" অভিযান মুকলি কৰিছে । এই অভিযানৰ দ্বাৰা বিদেশত আৱদ্ধ হৈ থকা ভাৰতীয়সকলক আকাশী পথেৰে ভাৰতলৈ ওভোটাই অনাৰ ব্যৱস্থা কৰিছে কেন্দ্ৰই ।
লগতে পঢ়কঃ ৫৮০ টন অত্যাৱশ্যকীয় সামগ্ৰীৰে মালদ্বীপত উপস্থিত নৌ-সেনাৰ জাহাজ কেশৰী
