নেশ্যনেল ডেস্ক,৭ ডিচেম্বৰ : বিহাৰৰ ৰাজধানী পাটনাৰ পুৰণি সচিবালয়ত থকা ৰাজধানী জলাশয়ত এতিয়া লাখ লাখ পৰিভ্ৰমী পক্ষীৰ কলৰৱ শুনিবলৈ পোৱা গৈছে । পক্ষীৰ মাতত গুঞ্জৰিত হৈছে সমগ্ৰ অঞ্চলটো । জলাশয়টোৰ মনোৰম দৃশ্যই অঞ্চলটোৰ লোকসকলকো আকৰ্ষণ কৰিছে । বহুতে পক্ষীবোৰৰ ফটো নিজৰ নিজৰ মোবাইল কেমেৰাত বন্দী কৰাৰ চেষ্টা কৰিছে ।
প্ৰতি বছৰে শীতৰ লগে লগে হাজাৰ হাজাৰ কিলোমিটাৰ দূৰৰ পৰা পৰিভ্ৰমী পক্ষীবোৰে পাটনাৰ ৰাজধানী জলাশয়ত উপস্থিত হয় । এইবাৰো ব্যতিক্ৰম হোৱা নাই । বিভিন্ন প্ৰজাতিৰ পক্ষীয়ে জলাশয়টোৰ শোভা বৰ্ধন কৰা দেখা গৈছে । পক্ষীবোৰৰ মাত শুনি স্থানীয় লোক আৰু পৰ্যটকসকল আকৰ্ষিত হৈছে । সচৰাচৰ বিদেশী পক্ষীবোৰ ছেপ্টেম্বৰৰ পৰাই আহিবলৈ আৰম্ভ কৰে ।
ৰাজধানী জলাশয়ৰ এগৰাকী কৰ্মচাৰীয়ে জনোৱা মতে তেওঁ যোৱা ৬ বছৰ ধৰি ৰাজধানী জলাশয়ৰ চোৱাচিতা কৰি আহিছে । বৰ্তমান, প্ৰায় ৬ টা প্ৰজাতিৰ পক্ষী জলাশয়টোলৈ আহিছে । কিন্তু শীতকালত ৩০ তকৈও অধিক প্ৰজাতিৰ পক্ষী জলাশয়টোলৈ আহে বুলি তেওঁ উল্লেখ কৰিছে । পক্ষীবোৰ জুলাই মাহলৈকে তাতে থাকে । প্ৰতি বছৰে চৰকাৰে পক্ষীবোৰৰ যত্ন লৈ আহিছে । পক্ষীবোৰৰ বাবে শস্য আৰু মাছ জলাশয়ত এৰি দিয়া হয় । ইফালে প্ৰতিদিনে স্কুলীয়া শিক্ষাৰ্থী আৰু সাধাৰণ নাগৰিকসকলে দেশী-বিদেশী পক্ষীবোৰ চাবলৈ জলাশয়টোত ভিৰ কৰা দেখা গৈছে ।
কৰ্মচাৰীজনে জনোৱা মতে ডিচেম্বৰৰ শেষৰ ফালে জলাশয়টোত ৬০০০ তকৈও অধিক পক্ষী দেখা যায় । পক্ষীবোৰৰ বাবে জলাশয়ত মাছ এৰি দিয়াৰ উপৰিও জলাশয়টোৰ পানী পৰিষ্কাৰো কৰা হয় ।
ৰাজধানী জলাশয়লৈ অহা পক্ষীবোৰৰ ভিতৰত আছে বিভিন্ন প্ৰজাতিৰ হাঁহ, বগলী, মৎস্যভোজী পক্ষী আদি । পক্ষীবোৰ দেশৰ ভিন্ন প্ৰান্তৰ উপৰিও আফ্ৰিকা, কানাডা, ৰাছিয়া, কাজাখস্তান আৰু পূৱ চাইবেৰিয়াৰ দৰে দেশৰ পৰাও আহে । অৱশ্যে প্ৰতি বছৰে কিছুমান নতুন নতুন পক্ষীৰো আগমন ঘটে বুলি জলাশয় কৰ্মচাৰীজনে উল্লেখ কৰিছে ।
জলাশয়ৰ কৰ্মচাৰীজনৰ মতে এই সময়ছোৱাত ৰাজধানী জলাশয়ত বহু পক্ষীয়ে পোৱালিও জগায় । বিহাৰৰ বন বিভাগেও ইয়াৰ প্ৰতি লক্ষ্য ৰাখি পক্ষীবোৰৰ সুৰক্ষাৰ বাবে বিশেষ ব্যৱস্থা গ্ৰহণ কৰি আহিছে ।
অক্টোবৰত বিহাৰ চৰকাৰৰ বন বিভাগে কৰা এক জৰীপ অনুসৰি, এই বছৰ ৰাজ্যখনত ৭০,০০০ বিদেশী পক্ষীৰ আগমন হৈছিল । য'ত প্ৰায় ২০৩ টা প্ৰজাতিৰ পক্ষী আছিল । জলজ পক্ষীৰ এই জৰীপ ৰাজ্যখনৰ ২৬ খন জিলাৰ ৭৬ টা আৰ্দ্ৰভূমিত কৰা হৈছিল ।
