স্পৰ্টছ ডেস্ক, 1 অক্টোবৰ: চলিত এছিয়ান গেমছত ভাৰতে নিজৰ সপোনৰ দৌৰ অব্যাহত ৰাখিছে ৷ দেওবাৰে ডিফেণ্ডিং শ্বট পুট চেম্পিয়ন তাজিন্দৰপাল সিং টুৰে ২০.৩৬ মিটাৰ বৃহৎ থ্ৰ’ৰে এই প্ৰতিযোগিতাত ভাৰতৰ দ্বাদশটো স্বৰ্ণ পদক লাভ কৰে ৷
এথলেটিকছত এইটো আছিল ভাৰতৰ দ্বিতীয়টো সোণৰ পদক আৰু ২০২৩ চনৰ এছিয়ান গেমছত সামগ্ৰিকভাৱে ১৩ নম্বৰৰ সোণৰ পদক ৷ তাজিন্দৰপাল সিঙে দুটা ফাউল থ্ৰ’ৰে আৰম্ভণি কৰিছিল যদিও এছিয়ান গেমছত একেৰাহে দ্বিতীয়বাৰৰ বাবে সোণৰ পদক লাভ কৰাৰ অন্তিমটো সুযোগ সম্পূৰ্ণৰূপে ব্যৱহাৰ কৰাটো নিশ্চিত কৰিছিল ৷ দেওবাৰৰ সোণৰ পদক লাভ কৰি তাজিন্দৰপাল সিঙে ইতিহাসৰ সৃষ্টি কৰে আৰু এই খেলত শ্বট পুটৰ ক্ষেত্ৰত ক্ৰমাগতভাৱে সোণৰ পদক লাভ কৰা চতুৰ্থজন ভাৰতীয় শ্বট পুটাৰ হিচাপে পৰিগণিত হয় ৷
ভাৰতীয় তাৰকাগৰাকীয়ে ছৌদি আৰৱৰ মহম্মদ দৌদাক অতিক্ৰমি ২০.৩৬ মিটাৰৰ অন্তিম থ্ৰ’ৰে শীৰ্ষ পদক লাভ কৰে ৷ এছিয়াডত মাত্ৰ তিনিগৰাকী ভাৰতীয় শ্বট পুট খেলুৱৈয়েহে পদক ৰক্ষা কৰিবলৈ সক্ষম হৈছে ৷ ভাৰতৰ পৰদুমন সিং ব্ৰাৰ (১৯৫৪ আৰু ১৯৫৮), যোগিন্দৰ সিং (১৯৬৬ আৰু ১৯৭০) আৰু বাহাদুৰ সিং চৌহান (১৯৭৮ আৰু ১৯৮২) এই তিনিগৰাকী খেলুৱৈয়ে শ্বট পুটত বেক টু বেক স্বৰ্ণ পদক লাভ কৰিছিল ৷
প্ৰধানমন্ত্ৰী নৰেন্দ্ৰ মোদীয়ে তাজিন্দৰপাল সিং টুৰক এছিয়ান গেমছত দেখুওৱা প্ৰদৰ্শনৰ বাবে অভিনন্দন জনায়। এক্স (পূৰ্বৰ টুইটাৰ)ত এটা পোষ্টত মোদীয়ে লিখিছে- ‘‘The phenomenal Tajinder Singh at his best. এছিয়ান গেমছত শ্বট পুট ইভেণ্টত একেৰাহে সোণৰ পদক লাভ কৰাৰ বাবে অভিনন্দন । তেওঁৰ প্ৰদৰ্শন ব্যতিক্ৰমী, যাৰ ফলত আমি সকলোৱে মন্ত্ৰমুগ্ধ হৈ পৰিছো ।’’
উল্লেখ্য যে, চীনৰ হাংঝৌত অনুষ্ঠিত এছিয়ান গেমছত ভাৰতে বৰ্তমানলৈকে মুঠ 52টা পদক লাভেৰে তালিকাৰ চতুৰ্থ স্থানত আছে ৷ ইয়াৰে 13 টা সোণ, 20 টা ৰূপ আৰু 19 টা ব্ৰঞ্জৰ পদক ৷
লগতে পঢ়ক: Indian Cricketer Jadeja : জাদেজাৰ বিষয়ে কি ক'লে তেওঁৰ শৈশৱৰ প্ৰশিক্ষকে ?
