নেশ্যনেল ডেস্ক,১৫ জানুৱাৰী : জম্মু-কাশ্মীৰ অঞ্চলত সন্ত্ৰাসবাদীৰ কাৰ্যকলাপ অব্যাহত আছে । অনুচ্ছেদ ৩৭০ বাতিলৰ পাছতো অঞ্চলটোত সন্ত্ৰাসবাদীৰ কাৰ্যকলাপ হ্ৰাস হোৱা নাই । বিভিন্ন স্থানত আত্মগোপন কৰি থকা সন্ত্ৰাসবাদীয়ে নিৰাপত্তা বাহিনীৰ ওপৰতো আক্ৰমণ কৰি থকা দেখা গৈছে । এনে পৰিস্থিতিত ভাৰতীয় সেনা তথা নিৰাপত্তা বাহিনীয়ে সন্ত্ৰাসবাদীৰ বিৰুদ্ধে অভিযান অব্যাহত ৰাখিছে ।
ৰাজৌৰী জিলাৰ পুঞ্চ অঞ্চলত সন্ত্ৰাসবাদীৰ আক্ৰমণ ঘটনাও বৃদ্ধি হোৱা দেখা গৈছে । এই বৰ্ধিত আক্ৰমণৰ মাজতে সন্ত্ৰাসবাদীক প্ৰতিহত কৰিবলৈ ভাৰতীয় সেনাই 'অপাৰেচন সৰ্বশক্তি' আৰম্ভ কৰিছে ।
যোৱা বছৰ ৰাজৌৰী আৰু পুঞ্চ অঞ্চলত ভাৰতীয় সেনাৰ ওপৰত সংঘটিত কেইবাটাও আক্ৰমণত জড়িত সন্ত্ৰাসবাদীসকলক ধৰাশায়ী কৰিবলৈ জম্মু-কাশ্মীৰৰ পীৰ পাঞ্জাল ৰেঞ্জৰ দুয়োফালৰ নিৰাপত্তা বাহিনীক অন্তৰ্ভুক্ত কৰি অভিযান সৰ্বশক্তি আৰম্ভ কৰিছে । যিটো অঞ্চলত সন্ত্ৰাসবাদীৰ আক্ৰমণত প্ৰায় ১৯ গৰাকী সেনা জোৱান শ্বহীদ হৈছিল ।
