নিউজ ডেস্ক, ১৬ ছেপ্টেম্বৰ : সমাগত পাঁচ ৰাজ্যৰ বিধানসভা নিৰ্বাচন । তাৰ বাবে কঁকালত টঙালি বান্ধি নিৰ্বাচনী কুছকাৱাজত নামিছে বিজেপি তথা বিৰোধী মিত্ৰজোঁট । তেলেংগানা, মধ্যপ্ৰদেশ, ৰাজস্থান, ছত্তীশগড় আৰু মিজোৰামত চলিত বছৰৰ ডিচেম্বৰত অনুষ্ঠিত হ'ব বিধানসভাৰ নিৰ্বাচন । অহা বছৰ লোকসভা নিৰ্বাচনৰ পূৰ্বে সেয়েহে এই পাঁচ ৰাজ্যৰ নিৰ্বাচনক একপ্ৰকাৰ ছেমিফাইনেল আখ্যা দিছে নিৰ্বাচনী বিশ্লেষকসকলে ।
আনহাতে, অক্টোবৰত ভূপালত বিৰোধী মিত্ৰজোঁট ইণ্ডিয়াই আয়োজন কৰিছে যুটীয়া ৰেলী । এই ৰেলীৰ পূৰ্বে কংগ্ৰেছে দাবী কৰে যে মধ্যপ্ৰদেশত পুনৰ প্ৰত্যাৱৰ্তনৰ পথত আছে কংগ্ৰেছ । আনহাতে, বিগত ছয় মাহত ৪০ জনতকৈও অধিক জ্যেষ্ঠ বিজেপি নেতাৰ যোগদানক ইয়াৰ সূচক হিচাপে উল্লেখ কৰিছে ।
"ভূপালত বিৰোধীৰ যুটীয়া ৰেলীয়ে মধ্যপ্ৰদেশৰ ভোটাৰসকললৈ এক শক্তিশালী বাৰ্তা প্ৰেৰণ কৰিব । ই নিশ্চিতভাৱে শক্তিশালী স্থিতিত থকা কংগ্ৰেছক সহায় কৰিব ।" মধ্যপ্ৰদেশৰ ভাৰপ্ৰাপ্ত এআইচিচি সম্পাদক চি পি মিট্টালে ইটিভি ভাৰতৰ আগত কয় । "ৰাজ্যিক বিজেপিত বিশৃংখলতাই বিৰাজ কৰিছে । যাৰ বাবে পৰাজয়ৰ আশংকাত আছে । সেয়েহে বিজেপি নেতাসকলে কংগ্ৰেছত যোগদান কৰিবলৈ দৌৰিছে । বিগত ছয় মাহত ৪০ জনতকৈও অধিক বিজেপি নেতাই কংগ্ৰেছত যোগদান কৰিছে আৰু বহুতে যোগদান কৰাৰ সম্ভাৱনা আছে । শীঘ্ৰেই আপোনালোকে দেখিব যে বিজেপিৰ কেইজনমান বৰ্তমানৰ বিধায়কেও আমাৰ সৈতে যোগদান কৰিছে ।" মিট্টালে লগতে কয় ।
উল্লেখ্য যে শেহতীয়াকৈ বিজেপি ত্যাগ কৰা ৪০ জন নেতাৰ ভিতৰত কেইবাজনো প্ৰাক্তন বিধায়ক আৰু মন্ত্ৰীও আছে । বিজেপিৰ দুজন প্ৰাক্তন মন্ত্ৰী, প্ৰাক্তন মুখ্যমন্ত্ৰী কৈলাস যোশীৰ পুত্ৰ দীপক যোশী আৰু ৰাধেলাল বাঘেলে মে' মাহত কংগ্ৰেছত যোগদান কৰিছিল । পিছত জ্যোতিৰাদিত্য সিন্ধিয়াৰ ঘনিষ্ঠ সহযোগী বৈজনাথ সিং যাদৱেও কংগ্ৰেছত যোগদান কৰে । শেহতীয়াকৈ নৰ্মদাপুৰমৰ প্ৰাক্তন বিধায়ক গিৰিজা শংকৰ শৰ্মাই কংগ্ৰেছত যোগদান কৰিছে ।
আনহাতে, এআইচিচিৰ বিষয়ববীয়াই সোঁৱৰাই দিছে যে হিমাচল প্ৰদেশ আৰু কৰ্ণাটকত একে ধৰণৰ প্ৰৱণতা দেখা গৈছিল । য'ত বিজেপি নেতাসকলে গেৰুৱা দলৰ পৰাজয় অনুভৱ কৰি বিধানসভা নিৰ্বাচনৰ পূৰ্বে কংগ্ৰেছত যোগদান কৰিছিল । "শিৱৰাজ সিং চৌহান চৰকাৰে বিগত ১৮ বছৰ ধৰি একো কৰা নাই আৰু ভোটাৰসকল তেওঁলোকৰ ওপৰত অসন্তুষ্ট । বিজেপিৰ শীৰ্ষ নেতৃত্বই এইটো অনুভৱ কৰিছে আৰু সেয়েহে প্ৰধানমন্ত্ৰী মোদীয়ে বিগত কেইমাহমানত দুবাৰকৈ সাগৰ জিলা ভ্ৰমণ কৰিবলগা হৈছে । কেন্দ্ৰীয় গৃহ মন্ত্ৰী অমিত শ্বাহেও ৰাজ্যখনলৈ সঘনাই ভ্ৰমণ কৰি আছে । তেওঁলোকে ক্ষতস্থানত মলম লগাবলৈ চেষ্টা কৰি আছে, কিন্তু এতিয়া বহু পলম হৈছে ।" মিট্টালে কয় ।
উল্লেখ্য, অক্টোবৰৰ প্ৰথম সপ্তাহত ভূপালৰ বিৰোধী যুটীয়া ৰেলীৰ পৰা লাভৰ তালিকা প্ৰস্তুত কৰাৰ উপৰি কংগ্ৰেছৰ ভিতৰ মহলে কৈছে যে নিৰ্বাচনমুখী ৰাজ্যখনত মিত্ৰজোঁটৰ অংশীদাৰ কংগ্ৰেছ আৰু সমাজবাদী পাৰ্টীৰ মাজত আদান-প্ৰদানৰ মনোভাবো দেখা গৈছে । সূত্ৰ অনুসৰি, এছপি মুৰব্বী অখিলেশ যাদৱে ২০১৮ চনত বুন্দেলখণ্ড অঞ্চলত ব্যাপক প্ৰচাৰ চলাইছিল আৰু তেওঁৰ দলে একমাত্ৰ বিজাৱাৰ বিধানসভা আসনত জয়লাভ কৰিছিল । আনহাতে, ছয়খন আসনত দ্বিতীয় স্থানত আছিল । সেয়েহে এছপিয়ে এতিয়া অঞ্চলটোৰ সাতখন আসনত প্ৰতিদ্বন্দ্বিতা কৰাৰ কথা কৈছে । যদিও ইণ্ডিয়া ব্লকৰ ভিতৰত আসন ভাগ-বতৰা বেছিভাগ ২০২৪ চনৰ লোকসভা নিৰ্বাচনৰ বাবে, কংগ্ৰেছে এছপিৰ দাবীৰ ওপৰত দৃষ্টি ৰাখিছে আৰু কেইখনমান আসনত মিত্ৰপক্ষক স্থান দিব পাৰে ।
"এই সমস্যাটো সমাধান কৰাৰ কেইবাটাও উপায় আছে । এছপিয়ে কেইখনমান আসনত প্ৰতিদ্বন্দ্বিতা কৰিব পাৰে বা ই আমাৰ নিৰ্বাচনী প্ৰতীকত প্ৰতিদ্বন্দ্বিতা কৰিব পাৰে বা এনে এটা ব্যৱস্থা থাকিব পাৰে যে এছপিয়ে মধ্যপ্ৰদেশত আমাৰ প্ৰাৰ্থীসকলক সমৰ্থন কৰে আৰু আমি আন কোনো ৰাজ্যত তেওঁলোকৰ প্ৰাৰ্থীসকলক সমৰ্থন কৰোঁ । ৰাজনীতিত সকলো বিকল্প সদায় খোলা থাকে, কিন্তু চূড়ান্ত সিদ্ধান্ত হাইকমাণ্ডে ল'ব । এয়া মোৰ বাহিৰত ।" মিট্টালে লগতে কয় ।
লগতে পঢ়ক :CWC meeting : হায়দৰাবাদত আৰম্ভ কংগ্ৰেছ ৱৰ্কিং কমিটিৰ প্ৰথমখন বৈঠক
