সন্ধিয়া 7 বজাৰ দহটা শীৰ্ষ বাতৰি

সন্ধিয়া 7 বজাৰ দহটা শীৰ্ষ বাতৰি...

নাগৰিকত্ব সংশোধনী আইনৰ বিৰুদ্ধে প্ৰতিবাদ কৰি বিগত এবছৰতকৈতও অধিক কাল কাৰাবন্দী হৈ থাকিব লগীয়া হৈছে অখিল গগৈ ৷ কৃষক নেতাজনৰ বিৰুদ্ধে ৰুজু হৈছিল আন কেইবাটাও গোচৰৰ লগতে ৰাষ্ট্ৰদ্ৰোহৰ গোচৰ ৷ বহুসময়ত কৃষকনেতাজনক কাৰামুক্ত কৰাৰ বাবে চৰকাৰক দাবী উত্থাপন কৰা হৈছে যদিও, বৰ্তমানলৈকে এই দাবী গ্ৰহণ কৰা হোৱা নাই ৷ কিন্তু অচিৰেই অখিল গগৈ মুকলি আকাশৰ তললৈ আহিব বুলি জানিব পৰা হৈছে ৷

বিটিআৰ ভোটযুদ্ধত পৰাজয় বৰণ কৰাৰ পাচতে হাগ্ৰামা মহিলাৰীয়ে প্ৰত্যাহাৰ কৰিব খুজিছে ব্যক্তিগত নিৰাপত্তাৰক্ষী ৷ বিটিচিৰ প্ৰাক্তন মুখ্য কাৰ্যবাহী সদস্য তথা বিপিএফৰ মুৰব্বী হাগ্ৰামা মহিলাৰীয়ে সকলো নিৰাপত্তাৰক্ষী প্ৰত্যাহাৰ কৰিবলৈ বিটিচিৰ আইজিপি লৈ প্ৰেৰণ কৰে এখন পত্ৰ ৷

টিএমপিকে, এমএমকে, টিএমএমকেৰ প্ৰতিবাদত উত্তাল তিনিচুকীয়া । ডিব্ৰু-চৈখোৱা ৰাষ্ট্ৰীয় উদ্যানক প্ৰকৃত ৰাষ্ট্ৰীয় উদ্যান হিচাপে গঢ়ি তোলা আৰু লাইকা দধিয়াবাসীৰ পুনৰ সংস্থাপনৰ দাবীত গণ বিক্ষোভ কাৰ্যসূচী ৰূপায়ণ । ১৫০০ৰো অধিক মিচিং জনগোষ্ঠীৰ লোকে টালি-টোপোলাসহ ওলাই আহি পুনৰ সংস্থাপনৰ দাবী জনায় ।

তিনিদিনীয়া কাৰ্যসূচীৰে শিৱসাগৰত ইউথ কানেক্ট আসামৰ উদ্যোগত পালন কৰা হ'ব ঐতিহ্য অসম সপ্তাহ ৷ যুৱ প্ৰজন্মৰ মাজত নিহিত হৈ থকা প্ৰতিভাসমূহ তথা সৃষ্টিশীলতাক ৰাইজৰ আগত পৰিচয় কৰাই স্বাৱলম্বিতাৰ দিশে আগুৱাই নিয়াৰ বাবে এই প্ৰয়াস গ্ৰহণ কৰা হৈছে ৷

বটদ্রৱা সমষ্টিৰ ৰাইডঙীয়া আৰু আইভেটি পঞ্চায়তৰ অন্তৰ্গত কেইবাটাও গুৰুত্বপূর্ণ স্থানত আঙুৰলতা ডেকাই ৯ লক্ষ টকাৰ অনুদান আগবঢ়ায় ।

মাধ্যমিক টেট পৰীক্ষাৰ যোগ্যতাৰ ভিত্তিত উত্তীৰ্ণ হ’বৰ বাবে সাধাৰণ শ্ৰেণীৰ পৰীক্ষাৰ্থী সকলে টেট পৰীক্ষাৰ দুয়োখন কাকততে পৃথককৈ ৬০ শতাংশ আৰু সংৰক্ষিত পৰীক্ষাৰ্থে সকলে ৫৫ শতাংশ নম্বৰ লাভ কৰাটো বাধ্যতামূলক কৰি দিছিল শিক্ষা বিভাগে ৷ কিন্তু এই পৰীক্ষাত ৪৬১৫ গৰাকী প্ৰাৰ্থীক ১ ৰ পৰা ৫ নম্বৰ পৰ্যন্ত দি উত্তীৰ্ণ কৰোৱা হৈছিল ৷ বিভাগীয় কৰ্তৃপক্ষই এই অতিৰিক্ত নম্বৰ গ্ৰেচ বুলি উল্লেখ কৰিছিল ৷

জটিল ৰোগত আক্ৰান্ত লখিমপুৰ জিলাৰ কদম বাগান গাঁৱৰ এটি এবছৰীয়া শিশু । শিশুটিৰ চিকিৎসাৰ বাবে প্ৰয়োজন কাৰোবাৰ সহায়ৰ হাত ৷ কিয়নো ইতিমধ্যেই শিশুটিৰ চিকিৎসাৰ নামত বহু সম্পত্তি বিক্ৰী কৰি আৰ্থিকভাৱে দুৰ্বল হৈ পৰিছে পৰিয়ালটো ৷

সম্প্ৰতি শ্বিলঙৰ অসম ভৱনৰ পৰাই পৰিচালিত হৈছে বড়োভূমিৰ ৰাজনীতি । শেহতীয়াকৈ হোটেল লিলিৰ পৰা ২৪ গৰাকী নিৰ্বাচিত পাৰিষদক স্থানান্তৰ কৰা হৈছে শ্বিলঙলৈ ।

অসম আৰক্ষীৰ কনিষ্টবল হাবিবুৰ ৰহমান হত্যাৰ গোচৰত গুৱাহাটী উচ্চ ন্যায়ালয়ৰ ৰায়দান । ডিমা হাচাও অসামৰিক ন্যায়িক দণ্ডাধীশৰ আদালতক শীঘ্ৰেই এই গোচৰ নিষ্পত্তি কৰিবলৈ নিৰ্দেশনা দিয়ে শীৰ্ষ আদালতে ৷

বিশ্বনাথ চাৰিআলি অতিৰিক্ত জিলা আৰু সত্ৰ ন্যায়াধীশ আদালতে ফাঁচীৰ নিৰ্দেশ দিলে শিশু ধৰ্ষণকাৰীক ।