তীব্ৰবেগী ট্ৰাকে মহতিয়ালে আৰক্ষীক দলক, এজনৰ অৱস্থা সংকটজনক

শিলচৰ, 10 জুন : দ্ৰুতবেগী ট্ৰাকৰ খুন্দাত আহত একাধিক আৰক্ষী কৰ্মী ৷ শিলচৰৰ ৰামনগৰ বাইপাছত অবৈধভাৱে সামগ্ৰী কঢিওৱা ট্ৰাক জব্দ কৰিবলৈ যাওঁতে এই অঘটন ৷ এই ঘটনাত কেইবাজনো আৰক্ষী জোৱান আহত হৈছে ৷ আহত সকলৰ এজনৰ অৱস্থা সংকটজনক বুলি জানিব পৰা গৈছে ৷ বৰ্তমান আৰক্ষী জোৱানজন শিলচৰ চিকিৎসা মহাবিদ্যালয়ত চিকিৎসাধীন হৈ আছে ৷

উল্লেখ্য যে, নিশা মিজোৰামৰ পৰা অবৈধ সামগ্ৰী ভৰ্তি ট্ৰাকখন ৰামনগৰ বাইপাছ হৈ যাব বুলি আৰক্ষীয়ে খবৰ লাভ কৰি তালাচী অভিযান চলাইছিল ৷ দ্ৰুতগতিত অহা ট্ৰাকখন তালাচী চলোৱা আৰক্ষীৰ দলটোক মহতিয়াই নিয়ে ৷ বৰ্তমান ঘটনা সংঘটিত কৰি পলায়ন কৰা ট্ৰাকখনৰ সন্ধানত আৰক্ষীৰ অভিযান অব্যাহত আছে ৷