কৃষ্ণাইত বৃহৎ পৰিমাণৰ চুৰি চুপাৰি উদ্ধাৰ

গোৱালপাৰা, ৬ মাৰ্চ: গোৱালপাৰা জিলাৰ কৃষ্ণাইত মাটিত পুতি থোৱা অৱস্থাত বৃহৎ পৰিমাণৰ চুৰি চুপাৰি উদ্ধাৰ ৷ কৃষ্ণাইৰ পাখিৰিগুৰীৰ জিয়াৰুল হক নামৰ চুপাৰি চুৰিত অভিযুক্তৰ গৃহৰ পিছফালৰ বাৰীত গাঁতৰ পৰা ৩০ বস্তাকৈ চুপাৰি উদ্ধাৰ কৰে আৰক্ষীয়ে ৷ উল্লেখ যে প্ৰায় এমাহ পূৰ্বে মৰিগাঁও জিলাৰ ধৰমতুলৰ পৰা চুপাৰিভৰ্তি মিনি ট্ৰাক এখন হাইজেক হৈছিল । এই সন্দৰ্ভত চুপাৰিৰ গৰাকীয়ে মৰিগাঁও আৰক্ষী থানাত এখন এজাহাৰ দাখিল কৰিছিল । এজাহাৰ দাখিলৰ পিছতে মৰিগাঁও আৰক্ষীয়ে চুপাৰিৰ সন্ধানত নামি পৰে ।

চুপাৰিৰ সন্ধানত মৰিগাঁও আৰক্ষীয়ে গোপন খবৰৰ ভিত্তিত গোৱালপাৰা কৃষ্ণাইৰ পৰা তিনিটাকৈ অভিযুক্তক আটক কৰিছিল । ইয়াৰে কৃষ্ণাই আৰক্ষীৰ সহযোগত মৰিগাঁও আৰক্ষীয়ে এসপ্তাহ পূৰ্বে কৃষ্ণাইৰ পাখিৰিগুৰীৰ জিয়াৰুল হক নামৰ এটা চোৰক গ্ৰেপ্তাৰ কৰিছিল । জিয়াৰুল হকৰ স্বীকাৰোক্তিৰ ভিত্তিত মঙলবাৰে সন্ধিয়াৰ ভাগত কৃষ্ণাই আৰক্ষীয়ে অভিযান চলাই পাখিৰিগুৰীত জিয়াৰুল হকৰ গৃহৰ পিছফালে মাটিত পুতি থোৱা অৱস্থাত ৩০ বস্তাকৈ চুৰি চুপাৰি উদ্ধাৰ কৰিবলৈ সক্ষম হয় । অৱশ্যে ২৫০ বস্তা চুপাৰিৰ ৩০বস্তাহে উদ্ধাৰ হোৱাত বাকী চুপাৰি বস্তা উদ্ধাৰৰ বাবে জিয়াৰুল হকক কৃষ্ণাই আৰক্ষী থানাত মাৰাথান জেৰা অব্যাহত ৰাখিছে আৰক্ষীয়ে ।

লগতে পঢ়ক:যোৰহাটত ১ হাজাৰ ৬৬ কোটি টকাৰ আঁচনিৰ শুভাৰম্ভ অজন্তা নেওগৰ