ৰাজনৈতিক মেৰপেচত আৱদ্ধ ছয় জনগোষ্ঠী জনজাতিকৰণ: আটাছু

যোৰহাট,২০ ফেব্ৰুৱাৰী: ছয় জনগোষ্ঠীক জনজাতিকৰণ দাবীত পুনৰ ৰাজ্য উত্তাল হৈ পৰিব সেয়া এক প্ৰকাৰ পৰিস্ফুট হৈ পৰিছে । ইয়াৰ অংশ হিচাপে টাই আহোম সাংস্কৃতিক বিকাশ কেন্দ্ৰৰ সন্মুখৰ পৰা আটাছু যোৰহাট জিলা সমিতিয়ে নগৰখনৰ মাজেৰে এক প্ৰতিবাদী বাইক ৰেলী বাহিৰ কৰে । বাইক ৰেলীত অংশগ্ৰহণ কৰি আটাছু যোৰহাট জিলা সমিতি সভাপতি ৰাজীৱ গগৈয়ে কয় যে ছয় জনগোষ্ঠী জনজাতিকৰণ বিষয়টো ৰাজনৈতিক মেৰপেচত আৱদ্ধ হৈ পৰিছে । যদি লোকসভা নিৰ্বাচনৰ প্ৰাকক্ষণত ছয় জনগোষ্ঠীক জনজাতিকৰণ বিষয়টো ক্ষেত্ৰত স্পষ্ট নকৰে তেতিয়া হলে ইয়াৰ পৰিণাম ভোগ কৰিবলৈ সাজু থাকক শাসনাধিষ্ঠ কেন্দ্ৰ আৰু ৰাজ্য চৰকাৰ ।  

উল্লেখ্য যে প্ৰধানমন্ত্ৰী নৰেন্দ্ৰ মোদীয়ে অসমত লোকসভা নিৰ্বাচনৰ প্ৰচাৰ চলাবলৈ আহি ঘোষণা কৰিছিল যে অসমৰ ছয় জনগোষ্ঠীক শীঘ্ৰে জনজাতিকৰণ কৰা হ'ব । কিন্তু আজিকোপতি এইক্ষেত্ৰত কেন্দ্ৰ চৰকাৰে কোনোধৰণৰ পদক্ষেপ গ্ৰহণ নকৰিলে আৰু একে নীতি অনুসৰণ কৰি ৰাজ্য চৰকাৰে এই ক্ষেত্ৰত দায়সৰা মন্তব্যহে প্ৰদান কৰা পৰিলক্ষিত হ'ল । ইফালে ছয় জনগোষ্ঠীৰ জনজাতিকৰণ বিষয়টো ৰাজনৈতিক ইচ্ছু হিচাপে জীয়াই ৰাখিলে বিজেপি চৰকাৰ লগতে অন্যান্য ৰাজনৈতিক দলসমূহেও । যাক লৈ এতিয়া জাঙুৰ খাই উঠিছে বিভিন্ন দল-সংগঠনসমূহ । 

লগতে পঢ়ক: চিৰাঙত হাত এৰি নাঙলত ধৰিলে জিলা সভাপতি-সম্পাদকে; বিপিএফত যোগদান ৫ শতাধিকৰ