ভূমি বিবাদক কেন্দ্ৰ কৰি কাছাৰত মহিলাসহ আহত 5

কাছাৰ, 12 ফেব্ৰুৱাৰী: ভূমি বিবাদক কেন্দ্র কৰি কাছাৰৰ কাটিগড়াত দুটা পক্ষৰ মাজত তুমুল মাৰপিটৰ ঘটনা সংঘটিত হৈছে । ভয়ংকৰ এই মাৰপিটৰ ঘটনাত উভয় পক্ষৰ পাঁচজনকৈ লোক গুৰুতৰভাবে আহত হৈ বৰ্তমান চিকিৎসাধীন হৈ আছে । প্রাপ্ত খবৰ অনুসৰি, কাটিগড়া জগদীশপুৰ অঞ্চলৰ বাসিন্দা চাহাব উদ্দিন আৰু আজিৰ উদ্দিনৰ মাজত দীর্ঘদিন ধৰি ভূমিকেন্দ্ৰিক বিবাদ চলি আহিছিল । 

কিন্তু দেওবাৰে এই ভূমিকেন্দ্ৰিক বিবাদে এক ভয়ংকৰ ৰূপ ধাৰণ কৰে । বিবদমান ভূমি দখল কৰাক লৈ দুপক্ষৰ মাজত তুমুল সংঘৰ্ষৰ সৃষ্টি হয় । হাতত দা, লাঠিসহ বিভিন্ন চোকা অস্ত্ৰলৈ এক পক্ষই আন পক্ষক আক্রমণ চলায় । চূৰ-মাৰ কৰি পেলোৱা হয় ঘৰ-দুৱাৰসহ দুখন বাহন । 

দুই পক্ষৰ এই ভয়ংকৰ মাৰপিটত উভয় পক্ষৰ পাঁচজনকৈ লোক আহত হয় । আহত লোককেইজন চাহাব উদ্দিন, শামিম উদ্দিন, ছফিয়া বেগম, ফাৰুক আহমেদ আৰু নুৰ আহমেদ । আহতসকলক ততাতৈয়াকৈ হাস্পতালত প্ৰেৰণ কৰা হয় । ইপিনে ঘটনাৰ খবৰ পাই ঘটনাস্থলীত আৰক্ষী উপস্থিত হৈ পৰিস্থিতি নিয়ন্ত্ৰণ কৰাৰ লগতে এজনক আটক কৰে । 

লগতে পঢ়ক: ভূমি বিবাদক কেন্দ্ৰ কৰি প্ৰচণ্ড মাৰপিট; আহত প্ৰায় 20 জন