মৰিগাঁৱত জালনোট, মেচিনসহ কৰায়ত্ত দুই

মৰিগাঁও, 28 ফেব্ৰুৱাৰী :  মধ্য অসমত জালনোট বিৰোধী অভিযান অব্যাহত আছে আৰক্ষীৰ ৷ মঙলবাৰে মৰিগাঁও জিলাৰ ভেলৌগুৰি আৰক্ষীয়ে এক অভিযান চলাই জালনোট সহ এটা মেচিন আৰু দুজন লোকক গ্ৰেপ্তাৰ কৰিবলৈ সক্ষম হয় ৷ এক গোপন সূত্ৰৰ পম খেদি মৰিগাঁও জিলাৰ ভেলৌগুৰি আৰক্ষী থানাৰ ভাৰপ্ৰাপ্ত আৰক্ষী বিষয়া মুক্তাব আলী বৰাৰ নেতৃত্বত হাঁহচৰা গাঁৱত চলিছিল এই অভিযান ৷ ধৃত লোকদ্বয় ক্ৰমে ছাবিৰুল ইছলাম আৰু ৰাজিকুল আলী বুলি জানিব পৰা গৈছে ৷ শোণিতপুৰ জিলাৰ বৈতামাৰী আৰু জামুগুৰি গাঁৱত ঘৰ দুই লোকৰ ৷

আৰক্ষীৰ দলটোৱে ধৃত লোকদ্বয়ৰ পৰা এটা নকল টকাৰ মেচিন, কিছু নকল টকা, দুটা মোবাইল ফোন আৰু কিছু অবৈধ নথি-পত্ৰ জব্দ কৰিছে বুলি জানিব পৰা গৈছে ৷ ইতিমধ্যে লোক দুজনক গ্ৰেপ্তাৰ কৰি মৰিগাঁৱলৈ প্ৰেৰণ কৰিছে ভেলৌগুৰি আৰক্ষীয়ে।

লগতে পঢ়ক: চেলেংহাটত ভয়াৱহ দুৰ্ঘটনাৰ পৰা কথমপি ৰক্ষা ৰাজধানী এক্সপ্ৰেছ