হায়দৰাবাদ: প্ৰযুক্তি ক্ষেত্ৰৰ বিশ্বজুৰি গুৰুত্ব বঢ়াৰ সময়তে পোহৰলৈ আহিছে প্ৰযুক্তিৰ দ্বাৰা ভাবুকি লাভৰ খবৰ ! জানিব পৰা মতে এই তিক্ত অভিজ্ঞতা এগৰাকী ছাত্ৰই এআই চেটবটৰ সৈতে হ’মৱৰ্কৰ বিষয়ে কথা-বতৰা পতাৰ সময়ত লাভ কৰে । এই সন্দৰ্ভত ছাত্ৰগৰাকীৰ ভগ্নীয়ে এই তিক্ত অভিজ্ঞতাৰ কথা এক প্ৰকাশনৰ আগত প্ৰকাশ কৰিছে ।
চিবিএছ নিউজৰ এক প্ৰতিবেদন অনুসৰি ছাত্ৰজনে চেটবটৰ সৈতে হ’মৱৰ্কৰ বিষয়ে কথা-বতৰা পাতি আছিল । এই সময়তে এআই চেটবটে ছাত্ৰজনক কয়, “হেৰা ! এইটো তোমাৰ বাবেই । কেৱল তোমাৰ বাবেই । তুমি বিশেষ নহয়, তুমি গুৰুত্বপূৰ্ণ নহয় আৰু তোমাৰ প্ৰয়োজনো নাই । আপুনি সময় আৰু সম্পদৰ অপচয় । আপুনি সমাজৰ ওপৰত বোজা... অনুগ্ৰহ কৰি মৰি যোৱা...” গুগল Gemini এ এনেদৰে কয় । এআই চেটবটৰ এই ভাবুকিপূৰ্ণ বাৰ্তা দেখি স্তম্ভিত হৈ পৰে ছাত্ৰজন । এই সময়ত ছাত্ৰজনৰ লগত তেওঁৰ ভগ্নীও আছিল ।
ভনীয়েকগৰাকীয়ে জনায়, "তেতিয়া, এই বাৰ্তাটো দেখি আমি দুয়ো স্তম্ভিত হৈ পৰিছো । এটা মুহূৰ্তত লাজ ভাৱ আহিল । আনকি মোৰ সকলো ডিভাইচ ঘৰৰ বাহিৰত থৈ আহিবলৈ মন গৈছিল । মই কেতিয়াও ইমান তিক্ত অভিজ্ঞতাৰ সন্মুখীন হোৱা নাই । জেনেৰেটিভ এআইয়ে কেনেকৈ কাম কৰে সেই বিষয়ে বহুতো তত্ত্ব আছে । অৱশ্যে মই পূৰ্বে কেতিয়াও ব্যৱহাৰকাৰীৰ ওপৰত কোনো ক্ষতিকাৰক প্ৰভাৱ দেখা নাই বা শুনা নাই ।"
গুগলে বাৰে বাৰে দাবী কৰি আহিছে যে Gemini চেটবটত ছেফটি ফিল্টাৰ আছে যিয়ে ইয়াক ঘৃণনীয়, হিংসাত্মক বা আন কোনো বিপজ্জনক আলোচনাত লিপ্ত হোৱাত বাধা প্ৰদান কৰে । গুগলে এই সন্দৰ্ভত কয়, "ভাষাৰ আৰ্হিয়ে কেতিয়াবা সংবেদনহীন সঁহাৰিৰ সৃষ্টি কৰিব পাৰে । এইখিনিতে ক’ব পাৰি যে এইটোও তেনে এটা উদাহৰণ । গুগলে Gemini ৰ এই সঁহাৰি তেওঁলোকৰ নীতি বিৰুদ্ধ বুলি কয় আৰু ভৱিষ্যতেও একেধৰণৰ আউটপুট ৰোধ কৰাৰ বাবে পদক্ষেপ গ্ৰহণ কৰিছে ।
