নিউজ ডেস্ক, 9 ছেপ্টেম্বৰ: বিজ্ঞান তথ্য-প্ৰযুক্তিৰ অভূতপূৰ্ব অগ্ৰগতিৰ সময়ত বৰ্তমান সমগ্ৰ বিশ্বজুৰি চৰ্চিত হৈছে কৃত্ৰিম বুদ্ধিমত্তাৰ বিষয়ে ৷ কৃত্ৰিম বুদ্ধিমত্তাৰ প্ৰতি বিশ্বজুৰি গুৰুত্ব বৃদ্ধি হোৱাৰ সময়তে সোমবাৰে কংগ্ৰেছ নেতা ৰাহুল গান্ধীয়ে কৃত্ৰিম বুদ্ধিমত্তা সন্দৰ্ভত আশাব্যঞ্জক বক্তব্য প্ৰকাশ কৰে ৷ এজনৰ স্থান সঠিক হ’লে কৃত্ৰিম বুদ্ধিমত্তা (AI) এটা ভাল সুযোগ হ’ব পাৰে বুলি কয় বিৰোধী দলৰ নেতাগৰাকীয়ে ।
সমান্তৰালভাৱে, ডালাছৰ টেক্সাছ বিশ্ববিদ্যালয়ৰ ছাত্ৰ-ছাত্ৰীৰ সৈতে মত বিনিময় কৰাৰ সময়ত AI য়ে চাকৰি কাঢ়ি নিব বুলি সৃষ্টি হোৱা ভয়-আশংকাৰ বিষয়ে কয় গান্ধীয়ে ।
তেওঁ কয় যে প্ৰতিটো নতুন প্ৰযুক্তিয়ে একাংশ চাকৰি কাঢ়ি লৈ যায় আৰু নতুন চাকৰিৰ সৃষ্টি কৰে ।
কংগ্ৰেছ নেতা ৰাহুল গান্ধীয়ে কয়, "প্ৰতিবাৰেই নতুন প্ৰযুক্তি অহাৰ লগে লগে যুক্তি দিয়া হয় যে ই চাকৰিৰ ক্ষেত্ৰত প্ৰত্যাহ্বানৰ সৃষ্টি কৰিব । যেতিয়া প্ৰথমবাৰৰ বাবে কম্পিউটাৰ আহিছিল আশংকা কৰা হৈছিল যে ই চাকৰি কাঢ়ি নিব । যেতিয়া প্ৰথমবাৰৰ বাবে কেলকুলেটৰ আহিছিল তেতিয়াও একেই আশংকা কৰা হৈছিল ৷ আনকি ‘ATM’ সেৱা আৰম্ভ হোৱাৰ সময়তো একেই আশংকা প্ৰকাশ কৰা হৈছিল ৷ কিছুমান মানুহৰ পৰা চাকৰি কাঢ়ি লৈ যায় আৰু তাৰ পিছত আন একাংশক এইবোৰত নিযুক্তি দিয়ে । চাকৰি নোহোৱা হ’ব বুলি মই নাভাবো, কিন্তু বিভিন্ন ধৰণৰ চাকৰিৰ সৃষ্টি হ’ব আৰু বিভিন্ন ধৰণৰ ব্যৱস্থাই কম-বেছি পৰিমাণে লাভৱান হ’ব ।”
নিজৰ মতামত বিশদভাৱে উল্লেখ কৰি কংগ্ৰেছ নেতাগৰাকীয়ে পুনৰ কয়, "মই ভাবো যে উদাহৰণস্বৰূপে ভাৰতৰ IT উদ্যোগত AI এ প্ৰকৃততে এটা গুৰুতৰ সমস্যাৰ সৃষ্টি কৰিব । কিন্তু মই নাভাবো যে বাজাজ নিৰ্মাণ কৰা স্কুটাৰত এনেকুৱা হ'ব । ই কিছুমান চাকৰি কাঢ়ি নিব, কিছুমান চাকৰি যোগ কৰিব আৰু যদি আপুনি সঠিকভাৱে সকলো পৰিচালনা কৰে তেন্তে ই এটা সুযোগ আৰু যদি আপুনি বেয়াকৈ কৰে তেন্তে আপুনি বিপদত পৰিব ৷"
প্ৰাক্তন প্ৰধানমন্ত্ৰী অটল বিহাৰী বাজপেয়ীৰ কথা উল্লেখ কৰি গান্ধীয়ে কয়, "মোৰ মনত আছে মাননীয় বাজপেয়ীয়ে ভাষণ দিছিল যে ভাৰতীয়ক কম্পিউটাৰৰ প্ৰয়োজন নাই । আৰু আন কোনোবাই ভাষণ দিছিল যে ভাৰতীয়ক ইংৰাজীৰ প্ৰয়োজন নাই । কিন্তু কম্পিউটাৰে ভাৰতত লাখ লাখ চাকৰিৰ সৃষ্টি কৰিলে । গতিকে ই নিৰ্ভৰ কৰিব আপুনি ভৱিষ্যতক কিদৰে লক্ষ্য কৰিছে ৷"
তিনিদিনীয়া আমেৰিকা ভ্ৰমণৰ বাবে দেওবাৰে টেক্সাছৰ ডালাছত উপস্থিত হয় ৰাহুল গান্ধী । কংগ্ৰেছৰ সাংসদগৰাকীক বিমানবন্দৰত আদৰণি জনায় ভাৰতীয় বহিঃৰাজ্য কংগ্ৰেছৰ অধ্যক্ষ ছেম পিট্ৰ’ডা আৰু ভাৰতীয় প্ৰবাসীসকলে ।
