কলিয়াবৰ, ৩১ মে': ৰাজ্যৰ বিভিন্ন প্ৰান্তত অব্যাহত বন্যহস্তীৰ উপদ্ৰৱ । ব্যতিক্ৰম নহয় কলিয়াবৰৰ বিস্তীৰ্ণ অঞ্চল । ইতিমধ্য়ে কাজিৰঙা ৰাষ্ট্ৰীয় উদ্যানৰ পৰা ওলাই অহা বন্যপ্ৰাণীৰ মুক্ত বিচৰণে মিনি কাজিৰঙালৈ পৰিণত কৰিছে কলিয়াবৰক । কেতিয়াবা যদি বনৰীয়া ম'হ, আন কেতিয়াবা গঁড়, কেতিয়াবা আকৌ বনৰজাৰ আতংক । মুঠতে বন্যপ্ৰাণীৰ বিচৰণে ত্ৰাসিত কৰি ৰাখে কলিয়াবৰবাসীক ।
ইফালে বন্যহস্তীৰ ত্ৰাস আকৌ দীৰ্ঘদিনীয়া । প্ৰায়ে কলিয়াবৰৰ বিভিন্ন অঞ্চলত বন্যহস্তীয়ে চলোৱা উপদ্ৰৱৰ খবৰে লাভ কৰি আহিছে সংবাদ শিৰোনাম । বিশেষকৈ কলিয়াবৰৰ শিলঘাটবাসীয়ে প্ৰায়ে বন্যহস্তীৰ উপদ্ৰৱত কটাবলগীয়া হয় বিনিদ্ৰ ৰজনী । বৃহস্পতিবাৰে নিশাও কলিয়াবৰত বনৰীয়া হাতীৰ আক্ৰমণত কথমপি ৰক্ষা পৰে এজন লোক । কলিয়াবৰৰ সোণাৰী চাহ বাগিচাৰ মাজবস্তিত নিশা শুই থকা অৱস্থাতে এটা বাসগৃহত উপদ্ৰৱ চলাই বনৰীয়া হাতীয়ে ।
বগাই গঞ্জু নামৰ লোকজনৰ ঘৰ ভাঙি লণ্ড-ভণ্ড কৰাৰ লগতে ঘৰত থকা ধান খাই বিস্তৰ ক্ষতিসাধন কৰে বনৰীয়া হাতীয়ে । বন বিভাগৰ লোক পলম কৈ উপস্থিত হোৱাত ক্ষোভ উজাৰে স্থানীয় লোকে । দীৰ্ঘদিনে কলিয়াবৰবাসীয়ে জীৱনটো হাতৰ মুঠিত লৈ ফুৰিছে যদিও বন বিভাগে এই ক্ষেত্ৰত বিশেষ পদক্ষেপ গ্ৰহণ কৰা পৰিলক্ষিত হোৱা নাই ।
প্ৰতিটো নিশাই বিনিদ্ৰ ৰজনী কটোৱাৰ লগতে ব্যাপক ক্ষয়-ক্ষতিৰ সন্মুখীন হৈছে বিস্তীৰ্ণ অঞচলটোৰ ৰাইজ । পথাৰৰ শস্য অনিষ্ট কৰাৰ উপৰিও ঘৰ-দুৱাৰ ভাঙি ব্যাপক ক্ষতিসাধন কৰিছে বন্যহস্তীয়ে । ইফালে হাতী-মানুহৰ সংঘাটত প্ৰাণ হেৰুৱাইছে কেইবাজনো নিৰীহ লোকে । সেয়ে শীঘ্ৰে বন্যহস্তীৰ সমস্য়াৰ সমাধান কৰাৰ আহ্বান জনাইছে কলিয়াবৰবাসীয়ে ।
