কলিয়াবৰ,১০ আগষ্ট: এতিয়া শাওণৰ বতৰ । পথাৰত কৃষিজীৱি ৰাইজৰ সীমাহীন ব্যস্ততা । ইয়াৰ মাজতে কলিয়াৰৰ এখন পথাৰত দেখা গ'ল ব্যতিক্ৰমী দৃশ্য । এজন খেতিয়কে দৃষ্টি কাঢ়িছে সকলোৰে । সততে সৰু-সৰু কথাতে অভাৱ-অসন্তুষ্টি, অজুহাতৰ পোহাৰ মেলি নিজৰ অকৰ্মণ্যতা লুকুৱাৰ চেষ্টা কৰা ব্যক্তি-বিশেষৰ বিপৰীতে কলিয়াবৰৰ এইগৰাকী বিশেষভাৱে সক্ষম ব্যক্তিৰ কৰ্ম-সংস্কৃতিৰ নিৰ্দশন আপোনাৰ-মোৰ বাবে হৈ পৰিব পাৰে প্ৰেৰণা, সাহসৰ উৎস ।
শাওণৰ বতৰত অসমত এতিয়া শালি ধানৰ কঁঠীয়া ৰোৱাত ব্যস্ত ৰোৱনী । কপালৰ ঘাম মাটিত পেলাই ভূঁই ৰোৱাৰ বাবে কঁঠীয়া তোলাৰ সময় এয়া । কলিয়াবৰৰ পথাৰতো দেখা গৈছে কৃষকৰ সীমাহীন ব্যস্ততা । সাধাৰণ কৃষকৰ লগতে কৃষি পথাৰত এগৰাকী বিশেষ ব্যক্তি । বিশেষভাৱে সক্ষম এগৰাকী ব্যক্তিৰ এতিয়া ব্যস্ততাৰ সীমা নাই ।
নলতলী গাঁৱৰ পৱন বৰ্মন নামৰ চকুৰে নেদেখা লোকজনেও কঁঠীয়া তুলিছে, ৰুইছে ভূঁই । ২০১৫ চনত এক অচিন ৰোগত আক্ৰান্ত হৈ পৱন বৰ্মনে চিৰদিনৰ বাবে হেৰুৱাব লগা হ'ল দৃষ্টি শক্তি । চকুৰে নেদেখিলেও পথাৰত কঁঠীয়া তোল, ভূঁই ৰোৱা , সৰিয়হ তোলা আদি কাম কৰি পৰিয়াল পোহপাল দি আহিছে বিশেষভাবে সক্ষম লোকজনে ।
কোনো ধৰণৰ চৰকাৰী সাহাৰ্য লাভ নকৰা বিশেষভাৱে সক্ষম পৱন বৰ্মনে জীৱন-যুঁজ চলাই গৈছে দিন হাজিৰা কৰি । এতিয়া কঁঠীয়া তুলি কোনোমতে পেটৰ ভাতমুঠি যোগাৰ কৰিছে যুৱকজনে । অনাগত দিনত চৰকাৰ বা কোনো সুহৃদবানে পৱন বৰ্মনৰ জীৱন-জীৱিকা লাভৰ ক্ষেত্ৰত সহায়ৰ হাত আগবঢ়াবনে সেয়া হ'ব লক্ষণীয় ।
