গুৱাহাটী, ২৩ আগষ্ট : নগাঁৱৰ ধিঙত নাবালিকাৰ ধৰ্ষণকাণ্ডক কেন্দ্ৰ পৰি সমগ্ৰ ৰাজ্যতে প্ৰতিবাদৰ জোৱাৰ উঠিছে ৷ প্ৰতিক্ৰিয়া প্ৰকাশ কৰিছে আলফা স্বাধীনেও । পৰেশ বৰুৱা নেতৃত্বাধীন আলফা স্বাধীনে দোষীক কৰায়ত্ত কৰি শীঘ্ৰেই ফাঁচিৰ ব্যৱস্থা কৰিবলৈ আহ্বান জনাইছে ।
যদিহে দেশৰ আইনমতে ফাঁচি দিব নোৱাৰে, তেন্তে ৰাইজৰ মাজলৈ দোষীক উলিয়াই দিবলৈ আহ্বান জনাইছে আলফা স্বাধীনে ৷ সংবাদ মাধ্যমলৈ আলফাৰ সহঃ প্ৰচাৰ সম্পাদক ঈশান অসমে ধিংকাণ্ডক লৈ শুকুৰবাৰে এক বিবৃতি প্ৰেৰণ কৰে । আলফা স্বাধীনে বিবৃতিটোত উল্লেখ কৰিছে,
“বিগত কিছু বছৰৰ পৰা অসমৰ বিভিন্ন অঞ্চলত নাৰী নিৰ্যাতনৰ ঘটনা বৃদ্ধি পোৱা পৰিলক্ষিত হৈছে ৷ অতি শেহতীয়াকৈ নগাঁও জিলাৰ ধিঙৰ এগৰাকী দশম শ্ৰেণীত অধ্যয়নৰত ছাত্ৰী ধৰ্ষিতা হ’ব লগা হয় ৷ ই সভ্য সমাজৰ বাবে অতিকৈ লজ্জাজনক বিষয় ৷ উক্ত ঘটনাৰ সৈতে যিকেইজন দুৰ্বৃত্ত জড়িত হৈ আছে, সেইসকলক অতি সোনকালে চিনাক্ত কৰি ফাঁচিকাঠত ওলমাবলৈ অসম চৰকাৰলৈ আহ্বান জনালো ৷”
লগতে বিবৃতিটোত আলফা স্বাধীনৰ তৰফৰ পৰা কোৱা হৈছে,
“অসম চৰকাৰ-প্ৰশাসনে যদি ভাৰতীয় আইন ব্যৱস্থাৰ অজুহাত দি তেনে পদক্ষেপ গ্ৰহণ কৰিব নোৱাৰে; তেন্তে সেইসকল পাষণ্ডক ৰাইজৰ মাজলৈ উলিয়াই দিয়ক, ৰাইজে তাৰ উচিত বিচাৰ কৰি আগলৈ এনে পাশৱিক ঘটনাৰ পুনৰাবৃত্তি নহ’বলৈ দৃষ্টান্ত দাঙি ধৰিবলৈ সক্ষম হ’ব ৷”
ইতিমধ্যেই এই ঘটনাক লৈ প্ৰতিক্ৰিয়া প্ৰকাশ কৰি তিনিদিনীয়া বৰাক ভ্ৰমণত থকা ৰাজ্যৰ মুখ্যমন্ত্ৰী হিমন্ত বিশ্ব শৰ্মাই কয় যে এইটোকে ধৰি যোৱা দুমাহত অসমত খিলঞ্জীয়া যুৱতী-মহিলাৰ ওপৰত মুঠ ২৩ টা ধৰ্ষণ-নিৰ্যাতনৰ ঘটনা সংঘটিত হ’ল ।
তেওঁ লগতে কয়, “যোৱা লোকসভা নিৰ্বাচনৰ পাছত অসমত ধিঙৰ ঘটনাটোকে ধৰি এনেধৰণৰ মুঠ ২৩ টা ঘটনা সংঘটিত হ'ল ৷ এই ঘটনাসমূহৰ সৈতে কিছুমান বিশেষ মানুহ জড়িত হৈ আছে ৷ ঘটনাত জড়িতৰ বিৰুদ্ধে আমি দৃষ্টান্তমূলক পদক্ষেপ গ্ৰহণ কৰিম ৷ আমাৰ নামনি, মধ্য আৰু বৰাক উপত্যকাৰ মানুহ এতিয়া ভয়-শংকাত দিন পাৰ কৰিবলগীয়াত পৰিছে ৷ অসমৰ মানুহে এই কথাবোৰ বুজিলে সকলোৰে বাবে ভাল ৷ আমাৰ শত্ৰু কোন, মিত্ৰ কোন আমি চিনাক্ত কৰিব জানিব লাগিব ৷”
উল্লেখ্য যে, মুখ্যমন্ত্ৰীৰ নিৰ্দেশ মৰ্মে ইতিমধ্যে ধিঙত উপস্থিত হৈছেগৈ ৰাজ্যৰ আৰক্ষী সঞ্চালক প্ৰধান জি পি সিং ৷
লগতে পঢ়ক : আকৌ ধৰ্ষণৰ বলি দেশৰ কন্যা: তিনি দুৰ্বৃত্তই ধৰ্ষণ কৰি পথৰ কাষত পেলাই থৈ গ’ল নাবালিকাক - Dhing Minor rape case
