গুৱাহাটী, ৩১ মে': ৰাজ্যত এতিয়া বানৰ তাণ্ডৱ । বৰষুণৰ ফলত ফেনে-ফোটোকাৰে বাঢ়িছে ৰাজ্যৰ নৈ-উপনৈসমূহ । যাৰ ফলত প্লাৱিত হৈছে ৰাজ্যৰ কেইবাখনো জিলা । বানৰ কবলত পৰিছে এখনৰ পাছত আনখনকৈ জিলা আৰু নতুন নতুন অঞ্চল ।
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষৰ শেহতীয়া তথ্য মতে, বৰ্তমান ৰাজ্যৰ ৯ খন জিলা বানৰ কবলত পৰিছে আৰু প্ৰায় ২ লাখ লোক বানত ক্ষতিগ্ৰস্ত হৈছে । বানত বিশেষভাৱে ক্ষতিগ্ৰস্ত হৈছে বৰাকৰ হাইলাকান্দি আৰু কৰিমগঞ্জ জিলা ।
তথ্য অনুসৰি, বিপদসীমাৰ ওপৰেৰে বৈ আছে কপিলী নদী । ইফালে বতৰ বিজ্ঞান কেন্দ্ৰৰ তথ্য অনুসৰি ৫ দিনলৈ অসমৰ লগতে উত্তৰ-পূৰ্বাঞ্চলত অব্যাহত থাকিব বৰষুণ । আনহাতে ৩০-৪০ কিল’মিটাৰ গতিবেগত ধুমুহা অহাৰ উপৰিও বিজুলী, ঢেৰেকনি আৰু ধাৰাসাৰ বৰষুণ অহাৰ সম্ভাৱনা আছে । তেনেস্থলত ৰাজ্যৰ বান পৰিস্থিতি আৰু অধিক ভয়াৱহ হোৱাৰ সম্ভাৱনা আছে ।
বানৰ কবলত ৰাজ্যৰ ৯ খন জিলা:
বানৰ কবলত পৰিছে ৰাজ্যৰ নগাঁও, হাইলাকান্দি, পশ্চিম কাৰ্বি আংলং, কৰিমগঞ্জ, কাছাৰ, হোজাই, গোলাঘাট, ডিমা-হাচাও আৰু কাৰ্বি আংলং জিলা । এই ৯ খন জিলাৰ ২২ টা ৰাজহ চক্ৰৰ ৩৮৬ খন গাঁও বানত ক্ষতিগ্ৰস্ত হৈছে । ইয়াৰ ভিতৰত কাছাৰ জিলাৰ ১৫০ খন আৰু কৰিমগঞ্জ জিলাৰ ১০০ খন গাঁও ক্ষতিগ্ৰস্ত হৈছে ।
বানত ক্ষতিগ্ৰস্ত প্ৰায় দুই লাখ লোক :
বানত কবলত পৰা ৰাজ্যৰ ৯ খন জিলাৰ ১,৯৮,৮৫৬ গৰাকী লোক ক্ষতিগ্ৰস্ত হৈছে । ইয়াৰ ভিতৰত ৮৭,৩৭৭ জন পুৰুষ, ৭৫,০৮২ গৰাকী মহিলা আৰু ৩৬,৩৯৭ টি শিশু আছে । কৰিমগঞ্জ জিলাৰ সৰ্বাধিক ৩৬,৯৫৯ গৰাকী লোক ক্ষতিগ্ৰস্ত হৈছে । জিলাখনৰ ১৫,৫৪৬ জন পুৰুষ আৰু ১১,৪১৭ গৰাকী মহিলা আৰু ৯,৯৯৬ টি শিশু বানৰ কবলত পৰিছে । সেইদৰে বানত কাছাৰ জিলাৰ ১,০২,২৪৬ গৰাকী, হাইলাকান্দিৰ ১৪,৩০৮ গৰাকী, হোজাইৰ ২২,০৫৮ গৰাকী, পশ্চিম কাৰ্বি আংলং জিলাৰ ৪৪ গৰাকী, নগাঁৱৰ ২২,৩৫৪ গৰাকী আৰু ডিমা-হাচাওৰ ৮৮৭ গৰাকী লোক ক্ষতিগ্ৰস্ত হৈছে ।
৩,২৩৯ হেক্টৰ শস্যভূমি ক্ষতিগ্ৰস্ত :
কালৰূপী বানত ৯ খন জিলাৰ ৩,২৩৮.৮ হেক্টৰ কৃষিভূমি ক্ষতিগ্ৰস্ত হৈছে । ইয়াৰ ভিতৰত কাছাৰ জিলাৰ সৰ্বাধিক ১,৫২৩ হেক্টৰ কৃষিভূমি বানত ক্ষতিগ্ৰস্ত হৈছে । আনহাতে বানত ক্ষতিগ্ৰস্ত হৈছে নগাঁও জিলাৰ ১,১৬৩ হেক্টৰ, হোজাই জিলাৰ ৪৫৮ হেক্টৰ, গোলাঘাট জিলাৰ ৭১ হেক্টৰ আৰু হাইলাকান্দি জিলাৰ ২৪ হেক্টৰ কৃষিভূমি ।
সাহায্য আৰু আশ্ৰয় শিবিৰ :
বান প্ৰভাৱিত ৰাজ্যৰ ৯ খন জিলাত ১১০ টা আশ্ৰয় শিবিৰ স্থাপন কৰা হৈছে । ইয়াৰে কাছাৰ জিলা সৰ্বাধিক ৫৩ টা, কৰিমগঞ্জ জিলাত ২৩ টা, হাইলাকান্দি জিলাত ১৯ টা, হোজাই জিলাত ৯ টা, ডিমা হাচাও জিলাত ৪ টা, নগাঁও জিলাত এটা আৰু পশ্চিম কাৰ্বি আংলং জিলাত এটা আশ্ৰয় শিবিৰ স্থাপন কৰা হৈছে ।
এই শিবিৰত ৩৫,৬৪০ গৰাকী লোকে আশ্ৰয় লৈছে । ইয়াৰ ভিতৰত ১০ গৰাকী গৰ্ভাৱতী মহিলা আৰু এজন বিশেষভাৱে সক্ষম লোক আছে । তদুপৰি আশ্ৰয় শিবিৰত ১৭,৯৪৪ জন পুৰুষ, ১৩,৪৬৫ গৰাকী মহিলা আৰু ৪,২২০ টি শিশু আছে । আনহাতে সাহায্য সামগ্ৰী বিতৰণৰ বাবে ৭,৪০৯ টা কেন্দ্ৰ স্থাপন কৰা হৈছে । ইয়াৰে কৰিমগঞ্জ জিলাত সৰ্বাধিক ৫,৪৩৭ টা কেন্দ্ৰ স্থাপন কৰা হৈছে ।
বানত এতিয়ালৈকে দুজনৰ মৃত্যু :
ৰাজ্যজুৰি ভয়াৱহ ৰূপ ধাৰণ কৰা বানত এতিয়ালৈকে দুজনৰ মৃত্যু হৈছে । ইয়াৰে এজন হাইলাকান্দি জিলাৰ লালাৰ আৰু এজন কৰিমগঞ্জ জিলাৰ ৰামকৃষ্ণ নগৰৰ ।
বানত ক্ষতিগ্ৰস্ত দুই লক্ষাধিক পশুধন :
ৰাজ্যৰ ৯ খন জিলা বানৰ কৱলত পৰিছে । বানৰ কৱলত পৰা জিলাসমূহৰ ২,৩৪,৫৩৫ টা পশুধন ক্ষতিগ্ৰস্ত হৈছে । ইয়াৰ ভিতৰত ৫১,৭১২ টা ডাঙৰ প্ৰজাতিৰ আৰু ৪৫,৫৯২ টা সৰু প্ৰজাতিৰ পশুধন । সেইদৰে পলিট্ৰি ফাৰ্মিঙৰ ১,৩৭,২৩১ টা পশুধন বানত ক্ষতিগ্ৰস্ত হৈছে । ইয়াৰে কৰিমগঞ্জ জিলাত সৰ্বাধিক ১,৭৬,৭২৩ টা পশুধন বানত ক্ষতিগ্ৰস্ত হৈছে । অৱশ্যে বানৰ পশুধনৰ মৃত্যু হোৱাৰ বাতৰি অহা নাই ।
বানৰ ক্ষয়-ক্ষতি :
ৰাজ্যত ত্রাসৰ সৃষ্টি কৰা প্ৰথমটো বানত ইতিমধ্যে ধ্বংস হৈছে ৮৫৫ টা আংশিকভাৱে কেঁচা ঘৰ আৰু ৩০ টা আংশিকভাৱে পকী ঘৰ । আনহাতে প্ৰলয়ংকাৰী বানত হাইলাকান্দি জিলাৰ ৮ টা আৰু নগাঁও জিলাৰ ৫ টা পথ ক্ষতিগ্ৰস্ত হৈছে । সেইদৰে বানত কৰিমগঞ্জ জিলাত এটা মথাউৰি বানত ক্ষতিগ্ৰস্ত হৈছে । বান প্ৰভাৱিত জিলাসমূহত বিভিন্ন আন্তঃগাঁথনিৰ ব্যাপক ক্ষতিসাধন হৈছে ।
উদ্ধাৰ অভিযান :
বান প্ৰভাৱিত জিলাসমূহত উদ্ধাৰ অভিযান জোৰদাৰ কৰি তোলা হৈছে । এছ ডি আৰ এফ, অগ্নি আৰু আপাতকালীন সেৱা, স্থানীয় প্ৰশাসন আৰু চিভিল ডিফেন্সকে ধৰি বিভিন্ন সংস্থা উদ্ধাৰ কাৰ্যত নিয়োজিত হৈ আছে । নাৱেৰে ইতিমধ্যে দুই শতাধিক লোকক উদ্ধাৰ কৰি নিৰাপদ স্থানলৈ নিয়া হৈছে ।
ইতিমধ্যে বানাক্ৰান্তৰ মাজত ৫৮২ কুইণ্টল চাউল, ৪৯৯ কুইণ্টল দাইল, ২৭ কুইণ্টল নিমখ আৰু ৩,১৪০ লিটাৰ মিঠাতেল বিতৰণ কৰা হৈছে । সেইদৰে শিশুৰ বাবেও খাদ্য সামগ্ৰীৰ যোগান ধৰা হৈছে । আনহাতে পশুধনৰ বাবেও খাদ্যৰ যোগান ধৰা হৈছে ।
