মৰাণ, ১৬ ছেপ্টেম্বৰ : ট্ৰেডিং কেলেংকাৰীক লৈ ৰাজ্যজুৰি বিতৰ্ক অব্যাহত আছে । সম্প্ৰতি এই কেলেংকাৰীৰ মূল অভিযুক্ত বিশাল ফুকন কাৰাগাৰত বন্দী হৈ আছে । একেদৰে বিশালৰ মূল সহযোগী অভিনেত্ৰী তথা কৰিঅ'গ্ৰাফাৰ চুমী বৰা আৰু ফটোগ্ৰাফাৰ তাৰ্কিক ডিব্ৰুগড় আৰক্ষীৰ জিম্মাত আছে ।
তাৰ্কিক বৰাৰ ভাতৃ অম্লান বৰাকো আৰক্ষীয়ে গ্ৰেপ্তাৰ কৰি জেৰা চলাই আছে । আৰক্ষীয়ে দিনে নিশাই তেওঁলোকক জেৰা অব্যাহত ৰাখিছে । তাৰ মাজতে দেওবাৰে মাজনিশা হঠাৎ চুমী, তাৰ্কিক আৰু অম্লানক লৈ ডিব্ৰুগড় অসম চিকিৎসা মহাবিদ্যালয় হাস্পতালত উপস্থিত হয় আৰক্ষীৰ এটা দল ।
- চুমী, তাৰ্কিক আৰু অম্লানৰ পেটৰ সমস্যা
বৃহস্পতিবাৰৰ পৰা আৰক্ষীৰ জিম্মাত থকা চুমী আৰু তাৰ্কিকক আৰক্ষীয়ে জেৰা অব্যাহত ৰাখিছে । জেৰাৰ মাজতে মাজনিশা প্ৰায় ১.২০ বজাত চুমী, তাৰ্কিক আৰু অম্লানক অসম চিকিৎসা মহাবিদ্যালয় হাস্পতাললৈ লৈ যোৱা হয় । কটকটীয়া নিৰাপত্তাৰ মাজত তেওঁলোকক হাস্পতাললৈ লৈ যোৱা হয় ।
সূত্ৰৰ মতে, তিনিওগৰাকীয়ে অসুস্থতাৰ কথা তদন্তকাৰী বিষয়াক অৱগত কৰিছিল । তাৰ পাচতে অসম চিকিৎসা মহাবিদ্যালয়ত জৰুৰীকালীন বিভাগত তিনিওকে ভৰ্তি কৰোৱা হয় । স্বাস্থ্য পৰীক্ষাৰ অন্তত পুনৰ আৰক্ষীয়ে পুৱতি নিশা তেওঁলোকক লৈ যায় । আৰক্ষীৰ সূত্ৰৰ মতে তেওঁলোকে সামান্য পেটৰ সমস্যাত (গেছ-বদহজম) ভুগি আছিল ।
- জেৰা অব্যাহত
অসম চিকিৎসা মহাবিদ্যালয়ৰ পৰা অনাৰ পাচতো পুৱালৈকে চুমী, তাৰ্কিক আৰু অম্লানক চিআইডিৰ অধীক্ষক সুধাকৰ সিংসহ তদন্তকাৰী আৰক্ষীৰ দলে মাৰাথন জেৰা অব্যাহত ৰাখে । জানিব পৰা মতে, তেওঁলোকক পৃথকে পৃথকে জেৰা চলোৱাৰ ভিডিঅ'গ্ৰাফীও কৰা হৈছে । মঙলবাৰে চুমী আৰু তাৰ্কিকৰ আৰক্ষীৰ জিম্মাৰ অন্ত পৰিব । সেয়ে কাইলৈ পুনৰ আৰক্ষীয়ে দুয়োকে আদালতত হাজিৰ কৰাব ।
দুয়োকে আৰক্ষীয়ে পুনৰ জিম্মাত লোৱাৰ সম্ভাৱনা আছে । লগতে বিশাল ফুকনকো ডিব্ৰুগড় কাৰাগাৰৰ পৰা পুনৰ আৰক্ষীয়ে নিজৰ জিম্মাত ল'বলৈ প্ৰস্তুতি চলাই আছে বুলি জানিব পৰা গৈছে ।
লগতে পঢ়ক :ট্ৰেডিং কেলেংকাৰী; ভুৱা প্ৰচাৰৰ বলি হ'ল নেকি জ্যেষ্ঠ চিকিৎসক ? - Assam Trading Scam
