তিনিচুকীয়া, ২৩ মে’: তিনিচুকীয়া জিলাৰ টঙনাগাঁও চাহ বাগিচাত ১১ গৰাকীকৈ লোকৰ কলেৰাসদৃশ বেমাৰত আক্ৰান্ত হৈ মৃত্যু হোৱা বুলি খবৰ বিয়পি পৰাৰ পাছতে ৰাজ্যজুৰি সৃষ্টি হৈছিল তীব্ৰ চাঞ্চল্যৰ ৷ সমান্তৰালভাৱে জিলা প্ৰশাসনৰ তৎপৰতাত স্বাস্থ্য বিভাগে গ্ৰহণ কৰে সকলো পদক্ষেপ । তাৰ পাছতে বৃহস্পতিবাৰে তিনিচুকীয়াৰ জিলা আয়ুক্ত স্বপ্নীল পালে এখন সংবাদমেলৰ জৰিয়তে সদৰী কৰে যে মৃত্যু হোৱা কোনো এজন লোক কলেৰা বেমাৰত আক্ৰান্ত হোৱা নাছিল ৷
স্বাস্থ্য বিভাগে টঙনাগাঁও চাহ বাগিচাৰ কুলিবিল লাইনত উপস্থিত হৈ পৰ্যবেক্ষণ কৰাৰ লগতে মৃত লোকসকলৰ পৰিয়ালৰ পৰা সকলো বিৱৰণ গ্ৰহণ কৰে আৰু নমুনাৰ ফৰেনছিক পৰীক্ষা সম্পন্ন কৰে ৷ সকলো তথ্য লাভ কৰাৰ পাছত মৃত ১১ গৰাকীৰ ৯ গৰাকীৰ দেহতেই কলেৰা ৰোগৰ কোনো লক্ষণ নাই বুলি নিশ্চিত হোৱাৰ লগতে এগৰাকীও লোক কলেৰাসদৃশ ৰোগত আক্ৰান্ত হোৱা নাছিল বুলি উল্লেখ কৰে ৷
লগতে পঢ়ক: আশ্চৰ্যকৰ ! চিতাৰ পৰাই তুলি নিলে বৃদ্ধাৰ মৃতদেহ - Suspicious death in tinsukia
ইয়াৰে দুগৰাকীৰ কিছু বমি আৰু শৌচ হৈছিল যদিও সেয়া কলেৰা বা টাইফয়ড নহয় বুলি প্ৰতিবেদনত কোৱা হৈছে৷ লগতে মৃত লোকসকলৰ অধিকাংশই থলুৱা মাদক দ্ৰব্য সেৱন কৰা আৰু নিমখজাতীয় খাদ্য অধিক গ্ৰহণ কৰাৰ বাবে মৃত্যু হোৱাৰ আশংকা প্ৰকাশ কৰিছে ৷
উল্লেখ্য যে, টঙনাগাঁও চাহ বাগিচাত শেহতীয়াকৈ 11 গৰাকী লোকৰ অচিন ৰোগত মৃত্যু হোৱাৰ পিছতে এক খবৰ ওলাইছিল যে কলেৰসদৃশ ৰোগত লোককেইজনৰ মৃত্যু হৈছে ৷ এই বাতৰি প্ৰকাশ পোৱাৰ পিছতেই অঞ্চলটোত চাঞ্চল্যৰ সৃষ্টি হয় ৷ কিন্তু জিলা আয়ুক্তই শেহতীয়াভাৱে স্বাস্থ্য বিভাগৰ পৰ্যবেক্ষণৰ তথ্য প্ৰকাশ কৰি এই বাতৰি মিছা বুলি সদৰী কৰিছে ৷
লগতে পঢ়ক: টঙনা চাহ বাগিচাত কলেৰাসদৃশ ৰোগত ১১ জনকৈ শ্ৰমিকৰ মৃত্যু - Tangana Tea Estate Tinsukia
